Almatyda bilim berý uıymdarynda qaýipsizdik sharalary kúsheıtilmek
Keńes barysynda bilim berý uıymdaryndaǵy qaýipsizdik, kámeletke tolmaǵandar arasyndaǵy qylmys pen sýıtsıdtik minez-qulyqtyń aldyn alý máseleleri, býllıngke qarsy is-qımyl jónindegi sharalar qaraldy.
Qalalyq bilim basqarmasynyń basshysy Lázzat Jylqybaevanyń, sondaı-aq Almaty qalasy prokýratýra ókiliniń baıandamalary tyńdaldy.
Qazirgi ýaqytta memlekettik mektepterde, ınternattyq mekemeler men kolledjderde ishki jáne syrtqy beınebaqylaý kameralary jumys isteıdi. Bilim berý uıymdarynda 400-den astam mektep psıhologtary men 140 mektep ınpektorlary bar.
Keńes qorytyndysy boıynsha Almaty qalasy ákiminiń orynbasary Erjan Babaqumarov bilim berý uıymdarynda, ásirese mektepter men kolledjderde qosymsha qaýipsizdik sharalaryn engizý boıynsha birqatar naqty tapsyrmalar berdi.
Bilim basqarmasyna qoǵamdyq densaýlyq basqarmasymen jáne qalalyq polıtsııa departamentimen birlesip vedomstvoaralyq aldyn alý, tárbıe jumystaryn kúsheıtý tapsyryldy.
Birinshiden, barlyq bilim berý uıymdaryn «soqyr aımaqtardy» eskere otyryp, beınebaqylaý júıelerimen jaraqtandyryp, olardy turaqty baqylaýdy qamtamasyz ete otyryp, polıtsııa departamentiniń jedel basqarý ortalyǵyna shyǵarýdy qamtamasyz etý qajet.
Balalardyń jáne barlyq qyzmetkerlerdiń qaýipsiz bolýy úshin bilim berý uıymdarynyń basshylary ótkizý rejıminiń saqtalýyna jáne kezekshiliktiń uıymdastyrylýyna, vahterlerdiń, kúzetshilerdiń jumysyna, jazbalardy mindetti túrde saqtaı otyryp, úzdiksiz beınebaqylaýdyń qamtamasyz etilýine turaqty baqylaýdy jalǵastyrýy, sondaı-aq qaýipsizdik qaǵıdalaryn saqtaý boıynsha turaqty túsindirý jumysyn júrgizýi qajet.
Osy baǵytta árbir bilim berý mekemesiniń kirý tobyna sheńberler men týrnıketter ornatý, balalar mekemelerin mamandandyrylǵan kúzetpen qamtamasyz etý máselesin qaraý tapsyryldy.
Ekinshiden, psıhologııalyq qyzmettiń, atap aıtqanda mektep psıhologtary men synyp jetekshileriniń sapaly jumysyn qamtamasyz etý tapsyryldy. Psıhologııalyq portret jasaý, onyń ishinde «Qaýipti toptar» sanatyn anyqtaý úshin jumysty kúsheıtý qajet.
Erekshe jaǵdaılarda kolledj, mektep, balabaqsha qyzmetkerleri úshin is-qımyl algorıtmin ázirleý, sondaı-aq azamattyq qorǵanys jáne tótenshe jaǵdaılar boıynsha oqý-jattyǵýlardy ótkizý praktıkasyn jalǵastyrý tapsyryldy. Sondaı-aq, kompıýterlik tehnıkaǵa tyıym salynǵan saıttardan súzgiler ornatylady.
Bilim berý uıymdarynyń aýmaǵyn jáne oǵan irgeles jatqan aýmaqtardy, jekelegen kóshelerdi jaryqtandyrý, sondaı-aq jasandy jol kedergilerin, baǵdarshamdar men mektepterdiń janynda toqtaýǵa tyıym salatyn belgilerdiń sanyn ulǵaıtý máselelerine erekshe nazar aýdaryldy. Bul baǵytta jumystardy aýdan ákimdikteri júrgizýde.
Buǵan deıin Almaty ákimi Baqytjan Saǵyntaev Qazandaǵy qaıǵyly oqıǵadan keıin mektepter men balabaqshalarda qaýipsizdik sharalaryn kúsheıtý týraly aıtqan bolatyn.