Almatyda balalar konkı tebýdi tegin úırenip júr

ALMATY. QazAqparat – Almatyda balalar úıiniń tárbıelenýshilerine tegin konkı teýip úıretý aksıasy jalǵasyp jatyr, dep habarlaıdy QazAqparat.

Jetim balalarǵa arnalǵan «Januıa» mamandandyrylǵan kesheniniń tárbıelenýshileri alǵashqy sabaqty 28 panfılovshy saıabaǵynda ótkizdi.

Ártúrli jastaǵy 30 bala 15 tájirıbeli nusqaýshynyń basshylyǵymen konkı tepti. Olar arasynda shaı iship, úzilis jasady.

Uıymdastyrýshylardyń aıtýynsha, sharanyń maqsaty – ósip kele jatqan býyndy sportqa baýlyp, salaýatty ómir saltyn ustanýǵa shaqyrý.

Esterińizge sala keteıik, 20 jeltoqsannan bastap qalanyń tórt tegin syrǵanaý oryndarynda balalar úıiniń tárbıelenýshilerine konkı teýip úıretý sabaqtary ótip jatyr. 2020 jyldyń kóktemine deıin 80-nen asa balaǵa konkı úıretý josparlanǵan.

Oqý kýrsy aıaqtalǵannan keıin balalarǵa syılyq tabystalady.