Almatyda balabaqshalar jumys isteı ma

ALMATY. QazAqparat - Almatyda mektepke deıingi mekemeler ýaqytsha jumys istemeıdi. Bul týraly Qala tirshiligin qamtamasyz etý shtabynan málim etti, dep habarlaıdy QazAqparat.

Qala tirshiligin qamtamasyz etý shtabynyń málimetinshe, Almatydaǵy barlyq bilim berý uıymdary qatań baqylaýda. QR Bilim jáne ǵylym mınıstrligi mektepterdegi qysqy demalystardy 17 qańtarǵa deıin uzartty. Al joǵary oqý oryndary men kolledj stýdentteri 24 qańtarǵa deıin demalady.

«Almatyda lańkestikke qarsy operatsııa júrip jatyr. Osyǵan baılanysty mektepke deıingi mekemelerdiń jumysy toqtap tur. Olardyń ashylatyn ýaqytyn aldaǵy kúnderi habarlaıtyn bolamyz», - dep atap ótti shtab ókilderi.

Sondaı-aq qalalyq Bilim berý basqarmasynda jedel jeli iske qosyldy. Turǵyndar bilim máselesine qatysty suraqtar týyndasa myna telefon nomerleri arqyly habarlasa alady: 376- 54-61, 8702 439 95 38.

Eske salaıyq, Almatynyń kommýnaldyq qyzmeti jappaı tártipsizdikterden keıin qalany tazartý jumysyna kiristi.

Búlingen baǵdarshamdar jóndelip, iske qosyla bastady. Keltirilgen shyǵyn - 72 mln teńge shamasynda.