Almatyda «Azııa daýysy» festıvali qashan ótetini belgili boldy

ALMATY. QazAqparat- «Medeý» muz aıdynynda 17 jyldan keıin aty ańyzǵa aınalǵan qazaqstandyq «Azııa daýysy» festıvaliniń áýenderi qaıtadan shyrqalady. Festıval 2023 jyldyń shilde aıynyń sońyna josparlanǵan, dep habarlaıdy QazAqparat tilshisi uıymdastyrý komıtetiniń baspasóz qyzmetine silteme jasap.

Uıymdastyrý komıteti óz mansabyn festıvaldiń basty mýzyka sahnasynan bastaǵan tanymal prodıýserlerden turady. Bas prodıýseri Armanjan Baıtasov, quryltaıshy jáne prezıdenti - Irına Kovyrıako, quryltaıshy jáne vıtse-prezıdenti zańger – Temirlan Tólegenov.

«Búginde Azııa basty nazarda jáne álemdik mádenıettiń damýyna áser etedi. Árıne, biz «Azııa daýysy» úzdik oryndaýshylar alańyna aınalýyna jáne onyń bedeldi bolýyna múddelimiz. Festıval shilde aıynyń sońyna josparlanǵan jáne qazir bizdiń mindetimiz- álemdik mýzyka qaýymdastyǵynyń josparlary týraly habardar etý jáne festıvalge ótinimderdi qabyldaýdy bastaý. Ázirge arnaıy qonaqtar tizimi anyqtalǵan joq, biraq kórermender juldyzdardy kútýde, sondyqtan biz týrısterdi tartatyn, álemdik deńgeıdegi ártisterdi shaqyrýdy maqsat qoıdyq. Biz Almaty qalasy ákimdiginiń jobamyzǵa qyzyǵýshylyq tanytyp, qoldaý kórsetip jatqanyna qýanyshtymyz, óıtkeni festıvaldiń ózi- búkil ındýstrııany damytý úshin mańyzdy oqıǵalardyń tutas serııasy, atap aıtqanda, biz mýzykalyq prodıýserlerdiń halyqaralyq forýmyn ótkizýdi josparlap otyrmyz»,- dedi festıvaldiń bas prodıýseri Armanjan Baıtasov.

1990 jyly «Azııa daýysy» halyqaralyq mýzykalyq festıvalinde alǵash ret 15 memleketten kelgen qatysýshy «Medeý» muz aıdynynda óner kórsetken edi.

Al 1993 jyly «Azııa daýysy» festıval uıymdastyrýshylary úkimetaralyq federatsııasynyń (FUÚF) múshesi boldy. 1994 jyly festıval Kann álemdik shoý-bıznes festıvaliniń (Frantsııa) mamandandyrylǵan syılyǵyna ıe boldy, 1998 jyly Halyqaralyq federatsııa uıymdastyrýshylary «Azııa daýysy» festıvali álemniń úzdik festıvali ataǵyna ıe boldy. Jyl saıyn festıval qonaqtary Sıýzı Kvatro, Coolio, «Bomfunk MC's», Jasmın, Valerııa, Nıkolaı Noskov, «Chaı vdvoem», «Eruption», Patrısııa Kaas, Pýpo, Toto Kýtýno, Djımmı Sammervıl, Mıthýn Chakrabortı, Soner Arıdja, Alla Pýgacheva, Fılıpp Kırkorov, Valerıı Leontev, Boney M, Haddaway jáne taǵy basqalary óner kórsetti. Buǵan deıin Almaty ákimi Erbolat Dosaev «Azııa daýysy» festıvali qaıta jandanatynyn aıtqan bolatyn. https://kaz.inform.kz/news/aziya-dauysy-festivali-kayta-otkizile-bastaydy_a3990107