Almatyda áıgili «Qara maıordyń» qurmetine eskertkish taqta ashyldy
Bul týraly QR Qorǵanys mınıstrliginiń baspasóz qyzmeti habarlady.
Saltanatty sharada áskerı bólimge Borıs Kerimbaevtiń esiminiń berilýi áskerı qyzmetshilerge júktelgen jaýapkershilikti sezinýge yntalandyrady jáne ol halyqqa qyzmet etýdiń úlgisi bolmaq. Sharaǵa bólimniń jeke quramy men basshylyǵy, Qarýly Kúshterdiń ardagerleri men polkovnık Kerimbaevtyń jubaıy qatysty.
«Búgin meniń qýanyshymda shek joq. Árıne joqtyń orny tolmas. Osy sapta turǵan bárińiz úshin naǵyz ustaz bola bildi. Men barlyqtaryńyzǵa myqty densaýlyq, otbasylaryńyzǵa amandyq tileımin. Jetken jetistikterińizben quttyqtaımyn», - dedi Raısa Kerimbaeva.
Esterińizge sala keteıik, áskerı barlaý qyzmetine qosqan úlesi men orny erekshe ekenin eskere otyryp, 2019 jylǵy 4 qyrkúıektegi Qorǵanys mınıstriniń buıryǵymen arnaıy maqsattaǵy áskerı bólimge Borıs Kerimbaevtyń aty berildi.
Polkovnık B. Kerimbaev, V.I. Lenın atyndaǵy Tashkent joǵary jalpyáskerı komandalyq ýchılışesin támamdaǵan. Motoatqyshtar vzvodynyń komandıri, Orta Azııa áskerı okrýgynyń barlaý rotasynyń, shtabynyń jáne motoatqyshtar batalonynyń basqarýshy qyzmetterin atqarǵan.
1981 jyly Kerimbaev Aýǵan eline jiberilgen bolatyn. Ol basqarǵan jasaq Pandshır shatqalyndaǵy Ahmad Shah Masýdtyń modjahedter quramalaryna qarsy turǵan. Segiz aıǵa sozylǵan udaıy atystardan, qonystaný operatsııalary men reıdterden keıin modjahedterdiń basshysy ýaqytsha bitimge kelisýge májbúr boldy. Nátıjesinde Keńes áskerlerine qarsy toptardyń jaýyngerlik is-qımyldary toqtatyldy.
Óz jasaǵy «Qara maıor» dep atap ketken sardardyń esimi barlyq áskerı qyzmetshilerdiń máńgi esinde qaldy. Aýǵan elinen keıin Kerimbaev 22-shi arnaıy maqsattaǵy brıgada komandıriniń orynbasary, 546-shi arnaıy maqsattaǵy oqý polkiniń komandıri bolyp qyzmet etti. 1992 jyly densaýlyq jaǵdaıyna baılanysty polkovnık áskerı ataǵymen Qarýly Kúshter qatarynan shyǵaryldy.
2019 jyly 12 aqpanda uzaq aýrýdan keıin Borıs Kerimbaev Almaty qalasynda ómirden ótti.
