Almatyda aýlasynda marıhýana ósirgen aǵaıyndylar ustaldy
Esirtkige qarsy qylmystyń jolyn kesýge, quramynda esirtki bar ósimdikti zańsyz egýge qarsy baǵyttalǵan «Dopıng» respýblıkalyq jedel-aldyn alý sharasy aıasy ótkizilip jatyr. Almaty qalasynyń polıtseıleri 33 jáne 31 jastaǵy aǵaıyndynyń zańsyz áreketin anyqtady. «Bastapqyda jedel jáne arnaıy is-sharalar kesheni júrgizildi. Jedel aqparat rastaldy. Kúdiktiler ustaldy. Er adamdar Almaty qalasynyń Alataý aýdanynda ornalasqan úıiniń aýlasynda marıhýana ósirgeni belgili boldy. Baqshadan sot-hımııalyq saraptamaǵa sáıkes jalpy salmaǵy 24 keli 300 gramm bolatyn 98 túp jabaıy qarasora tárkilendi. Bul fakti boıynsha sotqa deıingi tergeý bastaldy, onyń barysynda aǵaıyndylar qandaı maqsatta tyıym salynǵan shópti ósirgeni anyqtalady», – dedi Almaty qalalyq Polıtsııa departamenti Esirtki qylmysyna qarsy kúres basqarmasynyń bastyǵy Erlan Álmaǵambetov.
