Almatyda apatty mektepterdi joıý qolǵa alyndy
ALMATY. QazAqparat - Almatyda apatty mektepterdi joıý jáne úsh aýysymdy oqýdan arylý úshin jańa nysandardyń qurylysy júrgizilip jatyr. Bul týraly qalalyq Bilim basqarmasynyń basshysy Lázzat Jylqybaeva málim etti, dep habarlaıdy QazAqparat tilshisi.
Málim etilgendeı, «Shetsiz qala» qaǵıdatyn eskere otyryp, Almatyda sapaly jáne qoljetimdi bilim berý qyzmetterin usyný boıynsha keshendi jumys júrgizilýde. Orta bilim berý salasynda apatty mektepterdi joıý jáne úsh aýysymdy oqýdan arylý máselesi erekshe baqylaýǵa alyndy.
Mysaly, Túrksib aýdanyndaǵy №59 mektep-gımnazııa (1939 jyly salynǵan) apattyq jaǵdaıda dep tanylǵan. Qazirgi ýaqytta qoldanystaǵy ǵımaratty qaıta salý boıynsha jobalyq-smetalyq qujattar ázirlenip jatyr. Al qurylys-montajdaý jumystary 2021 jyly bastalady.
Sondaı-aq Alataý aýdanyndaǵy №196 jalpy bilim beretin mektepte oqýshylar sany artqany atap ótildi.
«Qazir qashyqtan oqý kezinde bul másele aıtarlyqtaı ózekti bolyp turǵan joq. Alaıda mekteptiń jumysy shtattyq rejımde qaıta bastalǵanda úsh aýysymda oqý jalǵasady. Sondyqtan «Jumyspen qamtýdyń jol kartasy» aıasynda osy mekteptiń ornyna 2021 jyly 1500 oryndyq jańa mektep salynady», - dep habarlady ol.
Sonymen qatar, aýdandar bólinisinde júrgizilgen taldaý keıbir jaǵdaılarda oryn tapshylyǵy jasandy túrde týyndap otyrǵanyn kórsetti. Basqarmanyń málimetinshe, ata-analar balalaryn gımnazııaǵa berýdi jón kóretini jáne jalpy bilim beretin mektepterde oryn profıtsıti paıda bolý mysaldar bar. Osyǵan baılanysty aýdan basshylarynyń jumysyn kúsheıtý boıynsha tıisti tapsyrmalar berildi.
