Almatyda alǵashqy ulttyq genderlik kýrsty ótkizý talqylandy

NUR-SULTAN. QazAqparat - Qazaqstan Respýblıkasy Qorǵanys mınıstrliginiń Bitimgerlik daıarlyq ortalyǵynda Birikken Ulttar Uıymynyń shtab-páteri men Qazaqstan Respýblıkasyndaǵy Kanada Elshiliginiń ókilderimen kezdesý ótti, dep habarlaıdy QR QM baspasóz qyzmeti.

Taraptar genderlik aspektiler jónindegi alǵashqy ulttyq kýrsty bitimgerlik daıarlaý ortalyǵynyń bazasynda ótkizý josparlaryn talqylady. Kezdesý barysynda kýrstyń baǵdarlamasy, ony ótkizý merzimi jáne uıymdastyrý máseleleri jan-jaqty qaraldy.

Ortalyqtyń bastyǵy polkovnık Baýyrjan Nyǵmetýllın qonaqtarǵa alǵysyn bildirdi. Sondaı-aq, genderlik aspektiler boıynsha kýrs halyqaralyq áriptesterdi anaǵurlym qyzyqtyryp, bolashaqta qazaqstandyq ortalyqty barynsha bilýge yqpal eterine senim bildirdi.

Genderlik teńdik máseleleri – jalpy BUU-nyń bitimgerlik qyzmetiniń jáne onyń ishinde ulttyq kontıngentterdi daıarlaý protsesiniń ózekti ári ajyramas bóligi. Qazaqstan Respýblıkasy álemdik tendentsııalardy eskere otyryp, árdaıym áskerı qyzmetshi áıelderdi bitimgerlik mıssııalarǵa qatysýǵa jiberedi.

2018 jyly BUU-nyń Batys Saharada referendým ótkizý mıssııasyna Qazaqstannan alǵash ret áskerı baqylaýshy retinde áıel áskerı qyzmetshi barǵanyn esterińizge sala keteıik. Ol maıor Sholpan Taýysheva bolatyn. 2019 jyldyń aqpan aıynda kapıtan Aıjan Jasuzaqova, artynsha kapıtan Rımma Shákeeva da osy mıssııany atqardy. BUU-nyń Lıvandaǵy Ýaqytsha kúshteriniń quramyna shtab ofıtseri retinde polkovnık Dılıa Ahmetova jiberildi