Almatyda alaıaqtyqtyń jańa túri paıda boldy

ALMATY. QazAqparat - Almatyda ózderin ádilet departamentiniń qyzmetkeri retinde tanystyratyn alaıaqtardyń sany artty. Osyǵan baılanysty óńirlik kommýnıkatsııalar qyzmeti alańynda qalalyq ádilet departamenti ókilderiniń qatysýymen shuǵyl brıfıng ótti, dep habarlaıdy QazAqparat tilshisi.

Qalalyq ádilet departamentiniń atqarýshylyq is júrgizýdi qamtamasyz etý bóliminiń basshysy Ánýar Jeksekovtyń aıtýynsha, alaıaqtar azamattarǵa telefon soǵyp, ózderin ádilet departamentiniń qyzmetkeri retinde tanystyryp, aldaý jáne sendirý jolymen turǵyndardan aqsha alyp júr.

«Aram pıǵyldy alaıaqtar jalǵan ónimdi ınternet, áleýmettik jeliler arqyly joǵary baǵamen satý shemasy arqyly jasaıdy. Al, aldanǵan turǵyndarmen kelisim jasalǵannan keıin barlyq telefondardy óshiredi. Ári qaraı alaıaqtar jábirlenýshilerge ózderin ádilet departamentiniń qyzmetkerleri retinde tanystyryp, telefon shalady, alaıaqtardyń ustalǵanyn habarlaıdy, jalǵan kýálik beredi jáne ótemaqy tóleýge ýáde beredi. Alaıda aldyn ala komıssııa túrinde tólem talap etedi», - dep túsindirdi spıker.

Ádilet departamentiniń baspasóz hatshysy Almas Bekbotaevtyń málimetinshe, búgingi kúni bes jalǵan qyzmetkerge qatysty qylmystyq is qozǵaldy.

«Ádilet departamenti polıtsııaǵa bes adamǵa qatysty barlyq dáleldeıtin materıaldarmen aryz joldady. Sotaldy tergep-tekserýdiń basqa derekteri Qylmystyq is júrgizý kodeksiniń 201-babyna sáıkes jarııa etýge jatpaıdy»,- dedi ol.

Vedomstvo ókilderi el turǵyndaryn óz týystaryna, dostary men tanystaryna alaıaqtyq faktileri týraly eskertýge, alaıaqtardyń arandatýy men úgitine senbeýge shaqyrdy.

Osyndaı jaǵdaı bolǵan jaǵdaıda, [phone] telefonyna habarlasyp, Almaty qalasy ádilet departamentiniń qazirgi qyzmetkerleri týraly aqparat alýǵa bolady.

Sonymen qatar, qyzmetkerlerdiń tizimderi departamenttiń resmı saıtynda jarııalanǵan.