Almatyda alaıaq polıtsııa qyzmetkerlerine pyshaq ala júgirdi

ALMATY. QazAqparat – 36 jastaǵy áıel alaıaqtyq jasady degen kúdikke ilindi. Ol birneshe adamdy qylmystyq jaýapkershilikten bosatýǵa ýáde bergen, dep habarlaıdy QazAqparat tilshisi.

«Kúdikti qala ortalyǵynda ustaldy. Ol polıtsııaǵa belsendi túrde qarsylyq kórsetip, pyshaqpen shabýyl jasaǵan. Ótip bara jatqan adamdardyń nazaryn aýdarý úshin aıqaılady», - dedi Almaly aýdandyq polıtsııa basqarmasynyń bastyǵy, polıtsııa polkovnıgi Esen Ysqaqov.

Ol polıtsııaǵa alǵashqy ótinish ótken jyldyń qazan aıynda túskenin málimdedi. Áıel qylmystyq jaýapkershilikten bosatýǵa kómektesemin degen jeleýmen klıentinen 20 myń AQSh dollaryn alǵan.

«Atalǵan azamatqa qatysty bıylǵy jyldyń mamyr aıynda ekinshi ret aryz tústi. Bul joly kúdikti qylmystyq quqyq buzýshylyqtyń kvalıfıkatsııasyn ózgertýge ýáde berip, 2,5 mıllıon teńge alǵan. Áıelge qatysty QR Qylmystyq kodeksiniń 190-baby 4-bóligi boıynsha qylmystyq is tergelýde», - dedi polıtsııa polkovnıgi.

Qazir tártip saqshylary ustalǵan azamattyń osyǵan uqsas epızodtarǵa qatysy baryn anyqtap jatyr.