Almatyda aqyn-jazýshylar baıqaýynyń jeńimpazdary anyqtaldy
Almaty ákimi Baqytjan Saǵyntaev Qazaqstan Jazýshylar odaǵynyń múshelerimen shyǵarmashylyq birlestikti qoldaý jáne damytý máselelerin talqylady, sondaı-aq mereıtoılyq dataǵa oraılastyrylǵan «Almaty-Táýelsizdiktiń altyn besigi» baıqaýynyń qorytyndysy shyǵaryldy.
Shyǵarmashylyq baıqaýǵa metrlermen qatar, jas aqyn-jazýshylar qatysty. Shyǵarmashylyq jumystar tórt janrda usynyldy – poezııa, proza, balalar ádebıeti, dramatýrgııa.
Ashat Ómirbaev «Áke, elge qaıtaıyqshy!» áńgimesi, Turysbek Sáýketaev «Kókshýlan» novellasy, Dýman Ramazan «Úkim» tarıhı dramasy, Patıgúl Mahsatova qazaq tilindegi óleńder toptamasy úshin jeńimpaz bolyp tanyldy.
Baqytjan Saǵyntaevtyń tapsyrmasy boıynsha ótken jyly 30 avtordyń jumysyn basyp shyǵarý úshin qarjy bólindi. Jas jazýshylardyń da, qazaq ádebıeti klassıkteriniń de eńbegi qoldaý tapty. Bıyl júzden astam tanymal sóz sheberi men jas avtorlardyń kitaptary jaryq kórdi. Kitaptardyń tusaýkeseri qala kitaphanalarynda ótedi.
«Jazýshylar qaýymdastyǵyn qoldaý jalǵasady. Sizder tarıhı oqıǵalardyń shynaıy kýási retinde olardy júrekten ótkizip, oqyrmanǵa jetkizesizder. Táýelsizdiktiń mereıtoıly jylynda sizderge zor densaýlyq pen shabyt tileımin!», - dedi Baqytjan Saǵyntaev.
Aıta keteıik, búginde Qazaqstan Jazýshylar odaǵynyń quramynda 820 múshe bar, olardyń 400-i Almatyda turady. 2019 jyldyń sońynda qalyptasqan dástúrge saı almatylyq aqyn-jazýshylar Almaty ákiminiń grantyna ıe boldy.
