Almatyda «Aqkent» turǵyn úı kesheninen taǵy da órt shyqty

ALMATY. QazAqparat – Almatyda «Aqkent» turǵyn úı kesheninde bir páterli úıden órt shyqty, dep habarlaıdy QazAqparat tilshisi.

Almatyda «Aqkent» turǵyn úı kesheniniń turǵyndary túngi ýaqytta taǵy órt sóndirýshilerdi shaqyrdy. Oǵan sebep 9 qabatty úıdegi bir bólmeli páterdiń ishinen órt shyǵýy boldy.

Turǵyndar taǵy da uıymshyldyq tanytyp, órt sóndirý kólikterine jol ashyp, jolda turǵan kólikterdi joldan ıterip tastaǵan. Oqıǵanyń vıdeosy jelige tarady.

Almaty qalalyq tótenshe jaǵdaılar departamentiniń málimeti boıynsha, órtsóndirýshiler 8 tamyz, saǵat túngi 03:45-te Alataý aýdany, «Aqkent» shaǵyn aýdany, 68 úıden shyqqan órtti sóndirdi.
«9 qabatty úıdiń 2-shi qabatyndaǵy 1 bólmeli páter ishindegi S=30 m2 aýmaqta úı turmysyndaǵy zattar órtendi (matras, zaqymdalǵan as úı jıyntyǵy)», - dep habarlady TJD-da.
Eske salaıyq, biz buǵan deıin Almatyda 16 qabatty úıde órt bolǵanyn habarlaǵanbyz.
Qyzyl jalyn saǵat 18:46 kezinde oqshaýlanyp, sóndirildi.
31 adam, onyń ishinde 16 bala aýrýhanaǵa jetkizilgen bolatyn.
Amaly qalmaǵan turǵyndar balalaryn terezeden laqtyrdy.
Zardap shekkenderdiń ishinde 2 júkti áıel bar.
Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady.
Órtten zardap shekken turǵyndar tamaq jáne jatyn orynmen qamtamasyz etildi.
«Aqkent» turǵyn úı keshenindegi órtke qatysty eki qylmystyq is qozǵaldy.