Almatyda aǵash qandalasy qaptady: óńdeý jumystary júrgizilýde

ALMATY. QazAqparat - Almaty ákimdigi turǵyndardyń aǵash qandalasy qaptap ketýine qatysty shaǵymdaryna jaýap berdi, dep habarlaıdy QazAqparat tilshisi.

«Bıyl Almatyda 2,3 mln-nan asa jasyl jelek óńdeledi. Jumys 15 sáýirde bastaldy. Bul aǵashtardyń turaqty kúıin jaqsartý jáne saqtaý jáne olardyń ártúrli zııankesterge tózimdiligin arttyrý úshin jasalady. Óńdeý japyraq jeıtin jáne japyraq soratyn zııankester men sańyraýqulaq aýrýlarynyń qozdyrǵyshtaryna qarsy júrgiziledi. Sondaı-aq, turǵyndardyń ótinishi boıynsha aǵash qandalasyna qarsy óńdeý de júrgizilip jatyr», - dep habarlady qalalyq ekologııa jáne qorshaǵan orta basqarmasynan.

Aıta ketý kerek, óńdeý eldi mekenderdiń aýmaǵynda qoldanýǵa ruqsat etilgen qaýiptiligi tómen bıologııalyq jáne keıbir jaǵdaılarda hımııalyq preparattarmen (P-4) júrgiziledi.

«Óńdeý jumystary zııankester men aýrýlardyń bıologııasynyń erekshelikterine, klımattyq faktorlarǵa baılanysty túnde jáne tańǵy ýaqytta júrgiziledi.Óńdeý ár maýsymda tórt kezeńde júzege asyrylady, Atap aıtar bolsaq, birnishi kezeń - 15 sáýirden 20 mamyrǵa deıin (onyń ishinde tórt ret emen, eki ret terek óńdeý), ekinshi kezeń - 30 mamyrdan 30 maýsymǵa deıin, úshinshi kezeń - 10 shildeden 10 tamyzǵa deıin jáne sońǵysy tórtinshi kezeń - 20 tamyzdan 20 qyrkúıekke deıin»,- dep túsindirdi basqarma ókilderi.

Buǵan deıin almatylyqtar aǵash qandalasynyń qaptap ketkenin aıtyp, dabyl qaqqan bolatyn.