Almatyda ádebı «Oskar» syılyǵynyń ıegerleri marapattaldy
Búgin Almatyda jańa kitaptardyń tusaýy kesildi. «Qashqyn» kitabyna «Altyn qalam 2018» baıqaýynda júlde alǵan eki shyǵarma, al «Jyldyń úzdik romany» atanǵan Aıdyn Kálimhannyń roman-bıografııasy men Esbolat Aıdabosynnyń «Jyldyń úzdik prozasy» atalymy boıynsha «It tirlik» áńgimesi enip otyr.
«Alashorda» toptamasynan «Altyn qalam 2017» ádebı saıysynyń bas júldegeri Álimjan Álpeıisovtiń «Ana júregi» jáne «Altyn qalam» ıegeri Aqylbek Shaıahmettiń «Sýyq jel» atty týyndysyn oqýǵa bolady. Qos shyǵarmaǵa tarıhı oqıǵalar arqaý bolǵan.
Sondaı-aq «Qazirgi qazaq satırasy» atty jınaqqa «Altyn qalam» ádebı júldesine qatysyp, oqyrmandardyń yqylasyna bólengen úzdik týyndylar enip otyr. Munda dostyq ráýishtegi syn, astarly ázilmen órilgen kúldirgi áńgimeler bar. Sonymen qatar jyldyń úzdik áńgimesi atanǵan Maqsat Qarǵabaıdyń «Ómirdiń ózi» atty kitaby da tanystyryldy.
«Osyǵan deıin kitap satatyn dúkenderde qazaq tilindegi kitaptar ústińgi bir buryshtarda turatyn. Rasýl Jumaly, Aıdos Sarym, Dosym tórteýimizdiń ádettegi kezdesýimizde osyǵan baılanysty úlken saıystar ótkizsek degen ıdeıaǵa toqtadyq. Odan beri «Altyn qalam» ádebı júldesiniń uıymdastyrylǵanyna 10 jyl tolyp otyr. Shyndyǵynda, bul konkýrstyń ǵumyry uzaq bolady dep oılamadyq. Buǵan deıin, kóktemde saıysty bastap, kúzde jeńimpazdardy anyqtaıtynbyz. Biraq, avtorlardy qýattandyrý maqsatymen ádebı kezdesýlerdi uıymdastyramyz dep sheshtik. Byltyrdan beri ekinshi ret ótip jatqan ádebı kezdesýde resmı túrde ádebı «Oskar» ótkizilip jatyr», - dedi «Altyn qalam» ádebı júldesi uıymdastyrý komıtetiniń dırektory Kenje Jumanuly.
Joǵaryda aıtyp ótkendeı, bıyl ekinshi ret ótip jatqan ádebı «Oskar» syılyǵy zamanaýı ádebıetti damytýǵa eleýli úles qosqan qalamgerlerge berildi. Jeńimpazdar «Altyn qalam» baıqaýy men Álemdik ekonomıka jáne saıasat ınstıtýtynyń áleýmettanýshysy Aıman Júsipova birlesip júrgizgen áleýmettik zertteýdiń qorytyndysy boıynsha anyqtaldy. Zertteýge 61 sarapshy qatysyp, qazaqstandyq ádebıettiń damý barysy men búgingi kitap naryǵynyń jaǵdaıyna baılanysty jeke pikirlerin de bildirdi.
Saýalnama nátıjesinde kelesi avtorlar men azamattar jeńimpaz atandy:
Meloman Publishing jyldyń úzdik baspasy atansa, jyldyń ádebı debıýti syılyǵyn Oral Arýkenova enshiledi.
Al Kitap like (oqyrmandar tańdaýy) Asqar Nurshaǵabuıyrdy.
Áleýmettik mánge ıe taqyrypqa arnalǵan úzdik kitap atalymynda Gýlnar Bajkenovanyń mereıi ústem boldy.
Oljas Qudaıbergenov jyldyń úzdik metsenaty (Ádebıetke kórsetken qoldaýy úshin) atandy.
«Bul kitapty men 2017 jyly jazyp shyqqanmyn, biraq 2018 jyly jaryq kórdi. ıÝrıı Serebrıanskıı esimdi áriptesim «Meloman» baspasyna meniń týyndymdy tapsyrǵan edi. «Pravıla neftıankı» atty shyǵarmama halyqaralyq kompanııalardaǵy, taý-ken isi men munaı ónerkásibindegi eńbek jolymda kezdesken túrli jaǵdaılar men tájirıbelerim arqaý bolǵan», - dedi ádebı «Oskar» syılyǵynyń ıegeri Oral Arýkenova.
