Almatyda Ábdijámil Nurpeıisovtiń 95 jyldyq mereıtoıy toılanýda
Abaı atyndaǵy Memlekettik akademııalyq opera jáne balet teatryna týǵan kún ıesiniń jaqyndary men týystary, sondaı-aq memleket qaıratkerleri men jazýshylar jınaldy.
Saltanatty jıynda QR Memlekettik hatshysy Qyrymbek Kósherbaev quttyqtaý sóz sóıledi. Ol Elbasy Nursultan Nazarbaev pen Qazaqstan Prezıdenti Qasym-Jomart Toqaevtyń joldaǵan quttyqtaýyn oqyp berdi.
«Qurmetti Ábdijámil Kárimuly! Mereıli 95 jasqa tolǵan torqaly toıyńyzben shyn júrekten quttyqtaımyn. Kózi tiri klassık, sóz óneriniń sardary, qurmetti qalamgerlerden týǵan qaıratker retinde siz ulttyq ádebıetimiz ben mádenıetimizdiń damýyna, onyń álemdik deńgeıde tanylýyna súbeli úles qostyńyz. Qalyń jurtyshylyq jaqsy biletin «Qan men ter», «Sońǵy paryz» sııaqty áıgili shyǵarmalaryńyz arqyly oqyrmanyń birneshe býynynyń shynaıy qurmetine bólendińiz. Halqyńyzdyń san-salaly tynys tirshiligin epopeıalyq aýqymmen sheber sýrettep, qazaqtyń ómirde qaıtalana bermes biregeı beınesin somdaǵan kórkem týyndylaryńyz jas urpaqqa ulaǵatty oı aıtýymen erekshelenedi. Aldaǵy ýaqytta da sizge shyǵarmashylyq tabys, zor densaýlyq, otbasyńyzǵa baq-bereke tileımin» delingen Nursultan Nazarbaev joldaǵan jedelhatta.
Prezıdent Qasym-Jomart Toqaevtyń quttyqtaý hatynda jazýshynyń «Qan men ter», «Sońǵy paryz» romandary qazaq kórkem sóziniń altyn qazynasyna enip, álem ádebıetinde ózindik orny bar rýhanı qundylyqqa aınalǵany jaıynda aıtylady. Jazýshynyń jalpyadamzattyq máselelerdi arqaý etken shyǵarmalary arqyly halqymyzdy búkil dúnıejúzi tanyǵanyna da toqtalǵan.
Saltanatty keshte Ábdijámil Nurpeıisovke QR Mádenıet jáne sport mınıstri Aqtoty Raıymqulova, Almaty qalasynyń ákimi Baqytjan Saǵyntaev, Qyzylorda oblysynyń ákimi Qýanyshbek Ysqaqov, sondaı-aq belgili jazýshylar men jýrnalıster jyly lebiz bildirdi.
Sonymen qatar, QR Parlamenti Májilisiniń Tóraǵasy Nurlan Nyǵmatýlın men QR Parlamenti Senatynyń Tóraǵasy Darıǵa Nazarbaeva quttyqtaý hat joldady.
Shyǵarmashylyq kesh kontserttik baǵdarlamaǵa ulasty.
