Almatyda Abaı murajaıynyń kórmesi ashyldy

ALMATY. QazAqparat – Ál-Farabı atyndaǵy QazUÝ jáne Abaıdyń «Jıdebaı-Bórili» memlekettik qoryq-mýzeıiniń uıymdastyrýymen ýnversıtet qabyrǵasynda Abaıdyń 175 jyldyq mereıtoıyna arnalǵan «Abaı álemi» atty kórme ashyldy, dep habarlaıdy QazAqparat tilshisi.

Kórme ál-Farabı atyndaǵy QazUÝ-degi Abaı zalyna qoıyldy. Onda Hakim Abaıdyń shyǵarmashylyǵy, ósken ortasy, ómir súrgen zamany týraly málimetter men uly aqyn ómirinen syr shertetin asa baǵaly aqparattar bar.

Sonymen qatar, kórermender nazaryna 1885 jyly Tarıhı ólketaný mýzeıine Abaı Qunanbaıulynyń óz qolymen tabystaǵan asa qundy jádigerleri usynyldy. Abaı mýzeıiniń qoryndaǵy aqynnyń túpnusqa eki fotosýretin, arhıvtik qujattar men qoljazbalaryn tamashalaýǵa bolady.

«Búgingi tańda mýzeıdiń negizgi qorynda 11 myńnan asa eksponat bar. Solardyń arasynda Abaıdyń beınesi bar eki fotosýret, P.D.Lobanovskııdiń aqynnyń kózi tirisinde qaryndashpen salǵan portreti, Abaıdyń 1896 jyly uly Maǵaýııaǵa jazǵan haty, 1885 jyly N.I.Dolgopolov arqyly Semeıdegi ólketaný mýzeıine tapsyrǵan zattar, Máskeý, Lenıngrad, Omby, Tom, Qazan qalalarynyń jáne Qazaqstan muraǵattarynan tabylǵan Abaıdyń ómiri, atqarǵan qyzmeti, týystary men zamandastaryna qatysty arhıv derekteri, Abaı oqyǵan medreseniń arab, túrik, shaǵataı tilderindegi kitaptary mýzeıdiń baǵa jetpes qundy dúnıesi», - deıdi Abaıdyń «Jıdebaı– Bórili» memlekettik qoryq-mýzeıiniń ǵylymı hatshysy Raýshan Elekenova.

Uıymdastyrýshylardyń aıtýynsha, kórmeniń basty maqsaty – Abaıdyń dúnıetanymyn jáne onyń rýhanı murasyn jastarǵa keńinen nasıhattaý.