Almatyda 82 jumys berýshi jalaqyny ýaqtyly tólemegeni úshin jaýapqa tartyldy

ALMATY. QazAqparat – Almaty qalasynyń eńbek ınspektsııasy basqarmasy jyl basynan beri 230 jospardan tys tekserý júrgizip, birqatar zańbuzýshylyqty anyqtaǵan, dep habarlaıdy QazAqparat tilshisi.

«Tekseris barysynda 112 zańdy tulǵaǵa 20,4 mln teńge, jalaqyny ýaqtyly tólemegen 82 zańdy tulǵaǵa 13,3 mln teńge kóleminde aıyppul salynyp, ákimshilik jaýapqa tartyldy. 177 kásiporynda 116,4 mln teńge jalaqy somasy boıynsha bereshek óteldi, jıyny 764 qyzmetkerdiń eńbek quqyqtary qorǵaldy», - dedi Almaty qalasy eńbek ınspektsııasy basqarmasynyń basshysy - bas memlekettik eńbek ınspektory Erkinbek Ámirǵalıev óńirlik kommýnıkatsııalar qyzmetiniń alańynda.

Ol sondaı-aq, qala kásiporyndarynda 30 jazataıym oqıǵa bolǵanyn aıtty.

«Bul rette 31 adam zardap shekken, onyń ishinde 4 adam qaza tapty, 9 adam aýyr, 18 adam jeńil jaraqat alǵan. Aıta keteıin, Almatyda 113 916 kásiporyn jumys isteıdi, jaldamaly qyzmetkerler sany – 897 925 adam», - dedi Bas memlekettik eńbek ınspektor Erkinbek Ámirǵalıev.