Almatyda 57 jastaǵy áıeldiń kókbaýyryna jańa ádispen ota jasaldy

ALMATY. QazAqparat – Almatyda 57 jastaǵy áıelge biregeı shaǵyn ınvazıvti ota jasaldy, dep habarlaıdy QazAqparat tilshisi.

Almaty qalalyq qoǵamdyq densaýlyq saqtaý basqarmasynyń málimetinshe, Almaty qalalyq onkologııalyq ortalyǵyna uıqy bezi quıryǵynyń isigi bar naýqas túsken. Dárigerler oǵan kókbaýyrdy saqtaıtyn dıstaldy uıqy beziniń rezektsııasy (Kımýr otasy) biregeı shaǵyn ınvazıvti otasyn jasady.

«Otanyń ereksheligi esh kesýsiz - laparoskopııalyq ádispen jasalady. Eń bastysy mundaı ota kezinde dárigerler kókbaýyrdy saqtap qalady. Bul patsıenttiń densaýlyǵy úshin mańyzdy, óıtkeni, kókbaýyr bakterııa men vırýstarmen kúresý úshin qandy súzýge jáne antıdenelerdi óndirýge qatysatyn organ»,- dep habarlady qoǵamdyq densaýlyq saqtaý basqarmasynda.
Onkohırýrgııa bólimshesiniń meńgerýshisi Nurlan Baltaevtyń aıtýynsha, kókbaýyrdy saqtap qalý úshin barlyq tarmaqtardy taýyp, biteý kerek boldy. Sebebi, tarmaqtar kókbaýyrdan uıqy beziniń quıryǵyna deıin sozylady.
«Buǵan deıin mundaı dıagnoz kezinde kókbaýyrdy isikpen birge alyp tastaıtynbyz. Qazir jańa ádister men qural-jabdyqtardyń arqasynda kókbaýyrdy saqtaı otyryp, osyndaı otalardy jasaı bastadyq. Atalmysh ota bir saǵatqa sozyldy. Ota kezinde kókbaýyrdy qutqarý úshin biz uıqy beziniń quıryǵyna tikeleı baratyn barlyq tarmaqtardy taýyp, olardy bitedik. Barlyǵy jaqsy ótti. Naýqastyń kókbaýyryn saqtap, isikti alyp tastadyq, ol gıstologııalyq zertteýge jiberildi. Naýqas otadan keıingi kelesi kúni bólimshege aýystyryldy», - dedi Nurlan Baltaev.
Sondaı-aq onyń, mundaı ota kesýsiz jasalady, demek az mólsherde qan joǵaltýmen erekshelenedi jáne otadan keıingi alǵashqy kúnderde-aq naýqas qalpyna tezirek kelip, otadan keıingi asqynýlar barynsha azaıa túsedi.
Osy oraıda almatylyq onkologtar dıagnozdyń ýaqytynda qoıylýy tolyq saýyǵýǵa múmkindik beretinin eskertti.