Almatyda 30 mamyrdan bastap meshitter men shirkeýler ashylady
Almaty qalasy bas memlekettik sanıtarlyq dárigeriniń 2020 jylǵy 28 mamyrdaǵy №32 qaýlysyna sáıkes, erteńnen bastap sanıtarlyq-dezınfektsııalaý rejıminiń talaptaryn qatań saqtaǵan jaǵdaıda qaladaǵy dinı mekemeler óz jumysyn bastaı alady.
Karantın ýaqytynda dinı oryndardyń jumys jasaýlaryna qoıylatyn basty talap: ujymdyq is-sharalardyń ótkizilýine shekteý qoıylýy. Atap aıtsaq, juma namazdary, senbi jáne jeksenbi kúni ótkiziletin ǵıbadattar, adamdarmen toptalyp dinı óleńder aıtý sekildi jáne basqa da ujymdyq sıpatqa ıe qulshylyqtardy ótkizýge ruqsat etilmeıdi. Atalǵan shekteýlerdiń basty maqsaty koronavırýs ınfektsııasynyń taralýynyń aldyn alý.
Sonymen qatar, qulshylyq kezinde dinı qyzmetshiler medıtsınalyq maska men qolǵap kııýge jáne de áleýmettik qashyqtyqty saqtaýǵa mindetti. Al, maska kımegen jáne respıratorlyq aýrýlardyń kez kelgen belgileri bar (temperatýranyń kóterilýi, jótel, tamaqtyń aýrýy, tynys alýdyń qıyndaýy) adamdar dinı oryndarǵa kirgizilmeıdi.
Óz kezeginde, dinı sharalarǵa qatysýlaryna ruqsat etilgen adamdarǵa ǵımarat ishinde 15-20 mınýttan artyq bógelýlerine ruqsat etilmeıdi.
