Almatyda 2017 jylǵy Ýnıversıadaǵa arnalǵan qysqy mını-jarystar bastaldy (FOTO)

ALMATY. QazAqparat- Búgin Almatyda Esentai Mall kesheni aldyndaǵy alańda 2017 jylǵy qysqy Ýnıversıadaǵa daıyndyq aıasynda tuńǵysh ret qysqy mını-jarystar bastaldy. Oǵan qala turǵyndary men qonaqtary jáne balalar qatysýda.

«Munda «Olımpıada aýyly» Esentai Square kesheni aýmaǵynda ornalasqan. Bul jarysta balalar men eresekter «Bıatlon», «Qappen sekirý», «Olımpıada saqınalarynan ótý», «Dopty hokkeı», «Hokkeılik penaltı» dep atalatyn jarystarǵa qatysady. Mını-jarystardy ótkizýdegi maqsatymyz - salamatty ómir saltyn nasıhattaý jáne balalar men eresekterdiń nazaryn qysqy sport túrlerine aýdarý. Sondaı-aq olarǵa Ýnıversıada kezinde bolatyn tamasha sporttyq atmosferany sezindirý», - dedi óz sózinde 2017 jylǵy Ýnıversıadany ótkizý dırektsııasy dırektorynyń orynbasary Nurgeldi Ábjanov.

Búgingi sporttyq sharaǵa qonaq retinde belgili sportshylar qatysyp, jarystarǵa qatysýshylardyń olımpıadalyq rýhyn kóterýge kúsh saldy. Olardyń arasynda ataqty alpınıst Maqsut Jumaev pen 2010 jylǵy Vankýver Olımpıadasynyń kúmis júldegeri Elena Hrýstaleva da bar.

Jarystar eki kún boıy osy alańda kúndizgi saǵat 13:00-den 17:00 aralyǵynda bolady. Olarǵa qatysý tegin. Bul mını-olımpıadaǵa 500-den astam adam qatysady dep kútilýde.

Aıta ketelik, qysqy mını-jarystardy Esentai Mall kesheni men 2017 jylǵy qysqy Ýnıversıadany uıymdastyrý dırektsııasy uıymdastyryp otyr.