Almatyda 2 tsentner zańsyz pırotehnıka tárkilendi

ALMATY. QazAqparat – Almatyda 25 jeltoqsannan bastap tótenshe jaǵdaılar departamenti men polıtsııa qyzmetkerleri pırotehnıkalyq buıymdar satylatyn oryndarda reıd júrgizip jatyr, dep habarlaıdy QazAqparat tilshisi.

Almaty qalalyq tótenshe jaǵdaılar departamentiniń baspasóz qyzmeti habarlaǵandaı, pırotehnıkalyq buıymdardy ótkizý qaǵıdalaryn buzǵan 23 adamǵa ákimshilik shara qabyldandy. QR zańnamasynyń talaptaryna saı kelmeıtin 262 jıyntyq (200 kg astam) pırotehnıkalyq buıym tárkilendi.

«Almaty qalasynda jyl saıyn Jańa jyl merekesinde 10-nan 15-ke deıin órt bolady. Onyń 18 paıyzy pırotehnıkalyq buıymdardan. Osyndaı oqıǵalardan keıin ótken jyly medıtsınalyq mekemelerge 39 adam, onyń ishinde 29 bala júgingen. Aýrýhanaǵa jatqyzylǵandar – 8 adam, onyń ishinde 7 bala bar», - dep atap ótti TJD baspasóz qyzmeti.

Mamandar qala turǵyndary men qonaqtaryna pırotehnıkalyq ónimderdi qoldaný kezindegi saqtyq sharalaryn eskertti:

- pırotehnıkalyq buıymdardy satyp alǵanda, oramynyń tutastyǵyna jáne onyń jaramdylyq merzimine nazar aýdaryńyz;

- 14 jasqa deıingi balalarǵa pırotehnıkany óz betimen qoldanýǵa jol bermeńiz;

- pırotehnıkany qoldaný kezinde ony ózińizden alystaý ustańyz;

- qaýipti aımaq radıýsynda (50 metr) pırotehnıkany ushyrýǵa eshqandaı kedergi (aǵash shoqtary, syzyqtar, otshashýlar baǵytyn ózgerte alatyn elektr jelileri) joq ekenine kóz jetkizińiz;

- pırotehnıkany qatty jelde qoldanbańyz;

- pırotehnıkalyq ónim jaramsyz bolǵan jaǵdaıda, ekinshi qaıtara qoldanbańyz;

- raketa men otshashýdy adamdarǵa qaraı baǵyttamańyz jáne aıaqtarynyń astyna laqtyrmańyz.

Foto: Almaty qalalyq TJD