Almatyda 19 jastaǵy stýdent esirtki jetkizetin kýrer bolyp tabys taýyp kelgen

ALMATY. QazAqparat - Almatyda esirtki tasýshy kýrer bolyp jumys istegen 19 jastaǵy stýdent ustaldy. Ony polıtsııa qyzmetkerleri men esirtki qylmysymen kúresýshiler oqıǵa ornynda ustady, dep habarlaıdy QazAqparat tilshisi.

Qaladaǵy joǵary oqý oryndarynyń biriniń 3-kýrs stýdenti eki aı boıy esirtki tasýshy kýrer bolyp jumys istegen.

Kúnine orta eseppen 20-25 esirtki jetkizip kelgen.

Jas jigit telegram chatta oryndalǵan jumysyn baıandap, sýret pen geolokatsııany kórsetip otyrǵan.

Ár esirtkini jetkizgeni úshin jumys berýshiden 1 myń 200 teńge alǵan.

«Esirtki satýshy «Qaırat» yqshamaýdanyndaǵy jeke úılerdiń biriniń mańynda jedel jáne arnaıy is-sharalar barysynda ustaldy. Tintý kezinde odan Mef 1,0*10 jáne Mef 0,5*15 degen jazýy bar polıetılen býma tabylyp, tárkilendi. Býmanyń ishinde ashyq-qońyr tústi untaq zatymen 25 polıetılen býma bar. Atalǵan derek tirkelip, Qylmystyq kodekstiń 297-baby 1-bóligi boıynsha tergelip jatyr», – dedi Almaty qalalyq polıtsııa departamentiniń esirtki qylmysyna qarsy kúres basqarmasynyń bastyǵy Saǵyndyq Aıaǵanov.

Eske sala keteıik, buǵan deıin Almatyda sıntetıkalyq esirtkini óndirýge arnalǵan shıkizattyń iri kólemi tárkilengenin jazǵanbyz.