Almaty Superski: Kók-Jaılaýdaǵy jańa kýrort ınklıýzıvti orta qalyptastyrady
ALMATY.KAZINFORM — Almaty mańyndaǵy taýlar endi jasyna jáne fızıkalyq múmkindikterine qaramastan árbir adam úshin qoljetimdi bolmaq. Osy qaǵıdany is júzinde júzege asyrý maqsatynda Kók-Jaılaý ústirtinde «Almaty Superski» jobasyn iske asyryp jatqan «Kazakh Tourism Development Ltd.» kompanııasy «Almaty qalalyq múgedekter qoǵamy» QB tóraǵasy Ulan Inkarbekovpen yntymaqtastyq týraly memorandýmǵa qol qoıdy.
Qujat bolashaq taý kýrortynyń ınklıýzıvti ınfraqurylymyn qalyptastyrý boıynsha taraptardyń nıetin bekitedi. Qazaqstandyq taraptan memorandýmǵa «Kazakh Tourism Development Ltd.» basqarma tóraǵasy Erjan Erkinbaev qol qoıdy. Kelisim sheńberlik sıpatqa ıe jáne 5 jyl merzimge jasalyp, taraptardyń ózara kelisimi boıynsha keıin uzartylýy múmkin.
Qujatqa sáıkes, Ulan Іńkárbekov múmkindigi shekteýli adamdar úshin kýrorttyń qoljetimdiligin qamtamasyz etý máseleleri boıynsha jobaǵa saraptamalyq jáne konsýltatsııalyq qoldaý kórsetedi. Birlesken jumystyń aıasynda Qazaqstan Respýblıkasynyń zańnamasy men halyqaralyq qoljetimdilik standarttaryna sáıkes ornalastyrý nysandaryna, qozǵalys baǵyttaryna, tamaqtaný oryndary men servıstik aımaqtarǵa arnalǵan ınklıýzıvti ınfraqurylym standarttary men talaptary ázirlenedi.
— Almaty Superski — biz barlyq almatylyqtar úshin salyp jatqan joba. Qoljetimdilik tehnıkalyq tapsyrmanyń jaı ǵana bir tarmaǵy bolmaýy kerek, ol kýrort fılosofııasynyń alǵashqy sheshimderinen bastap negizine aınalýy tıis. Almaty qalalyq múgedekter qoǵamymen yntymaqtastyq bizge árbir qadamymyzdy múmkindigi shekteýli qonaqtardyń qajettilikterin kez kelgen jobalaýshydan jaqsy túsinetin jandarmen birge saralap otyrýǵa múmkindik beredi, — dedi Erjan Erkinbaev.
Taraptar sondaı-aq múmkindigi shekteýli adamdarǵa beıimdelgen sporttyq jáne rekreatsııalyq baǵdarlamalardy birlesip ázirleý týraly kelisti. Múgedekter qoǵamynyń ókilderi ınklıýzıvtilik pen týrıstik ortanyń qoljetimdiligi taqyrybyna qatysty jobanyń qoǵamdyq is-sharalaryna, tanystyrylymdaryna jáne salalyq talqylaýlaryna qatysady.
— Múgedektigi bar adamdar úshin taýǵa shyǵý uzaq ýaqyt boıy qoljetpes arman bolyp keldi. Búginde Qazaqstanda alǵash ret ınklıýzııa keıinnen qosylatyn element emes, jobanyń basynan bastap negizge alynatyn bastama paıda bolyp otyr. Bizdiń qaýymdastyq úshin bul tek tabıǵatqa teń qoljetimdilikke ıe bolý ǵana emes, sonymen qatar barshaǵa shyn máninde yńǵaıly orta qalyptastyrýǵa atsalysý múmkindigi, — dep atap ótti Ulan Іńkárbekov.
Yntymaqtastyq aıasynda qoǵam ókiline uıymdastyrýshylyq jáne aqparattyq qoldaý kórsetilip, kýrort tujyrymdamasyna qatysty jobalyq qujattar men materıaldar usynylady. Taraptar «Almaty Superski»-di barlyq sanattaǵy qonaqtarǵa ashyq ınklıýzıvti týrıstik baǵyt retinde birlesip damytýǵa nıetti.
Memorandýmǵa qol qoıý joba aıasynda ǵylym, mádenıet, sport salalaryndaǵy qazaqstandyq qaıratkerler men qoǵamdyq uıymdar arasynan seriktesterdiń keń aýqymyn qalyptastyrý baǵytyn jalǵastyrady. Buǵan deıin «Almaty Superski» ekologııa, qaýipsizdik, mádenı mura jáne taý aýmaqtaryn damytý salalaryndaǵy birqatar otandyq sarapshylarmen uqsas kelisimderge qol qoıǵan bolatyn.
