«Almaty Resort» shıpajaıy: dertke – daýa, janǵa – shıpa
ALMATY. KAZINFORM – Adam densaýlyǵyn jaqsartýda shıpajaılardyń úlesi mol, dertke shıpa mıneraldy sýynyń aıryqsha mańyzy zor. Jańa múmkindiktermen, jańasha lepte jumys isteıtin Prezıdent Іs Basqarmasynyń Medıtsınalyq ortalyǵyna qarasty «Almaty Resort» shıpajaıy eldegi tanymal demalys oryndarynyń biri. Qonaqtarǵa eýropalyq standarttar boıynsha qyzmet kórsetetin sanatorıı jumysymen Kazinform agenttiginiń tilshileri de tanysyp qaıtty.
«Biz árbir patsıenttiń jeke talaptary men medıtsınalyq kórsetkishterin tolyq eskerip, tıimdi ońaltý jáne emdeý-saýyqtyrý baǵdarlamalaryn usynamyz. Óıtkeni, emdeý protsesindegi qamqorlyq pen jeke kózqaras — bizdiń medıtsınalyq jáne sanatorıı-kýrorttyq qyzmetterimizdiń basty artyqshylyǵy. Shıpajaı 135 orynǵa arnalaǵan. Jylyna 11500 adam kelip demalyp ketedi. Onyń ishinde 45 paıyzy aqyly, 50 paıyzy joldamamen keletin memlekettik qyzmetkerler jáne 5-10 protsenti mindetti áleýmettik medıtsınalyq saqtandyrýmen (MÁMS) keledi», — dep atap ótti ol.
«Almaty Resort» shıpajaıy — «Oqjetpes» emdeý-saýyqtyrý kesheni» aktsıonerlik qoǵamynyń fılıaly. Ol álemdik standartqa saı, eń ozyq zamanaýı medıtsınalyq qurylǵylarmen jabdyqtalǵan. Kýrort Almatydan úsh shaqyrym jerde, Іle Alataýynyń eteginde, teńiz deńgeıinen 1 052 metr bıiktikte ornalasqan. Onyń jalpy aýdany 21 gektar. Sanatorııdiń basty erekshelikteriniń biri — onyń mıneraldy sýy. Ol 3 000 metr tereńdikten alynady. Odan shyqqan sýdyń temperatýrasy — 42 gradýs. Keıin ol arnaıy qoımada saqtalady jáne vanna bólmelerine 36 gradýs jyly temperatýramen beriledi.
«Jeke uńǵymadan alynatyn mıneraldy sý. Mıneraldy sýdyń quramynda ıod, ftor, brom, marganets, kremnıı qyshqyly sııaqty mańyzdy mıkroelementter bar. D. I. Mendeleev kestesindegi barlyq elementter bar deýge bolady. Sý as qorytý júıesiniń, asqazan-ishek joldarynyń jáne basqa da organdardyń dertterin emdeýde taptyrmas shıpa. Sonymen qatar, ol túrli protsedýralarǵa, ıaǵnı mıneraldy vanna, gınekologııalyq, ishek jáne aýyz qýysynyń aýrýlary men ıngalıatsııa úshin qoldanylady. Mıneraldy sýdy paıdalanýdan basqa, munda balshyqpen emdeý protsedýralary bar. Biz kelýshilerdiń dıagnozyna qaraı taǵaıyndaımyz. Kúnine úsh ret ishý usynylady. Tamaqqa deıin nemese tamaqtan keıin jarty saǵat ótken soń ishý kerek. Bul sýdy asyqpaı az-azdan ishken abzal», — dedi dırektordyń emdeý-ońaltý jumysy jónindegi orynbasary Saltanat Beısembaeva.
Aıtýynsha, shıpajaıdyń medıtsınalyq blogy úsh qabatty ǵımaratta ornalasqan. Munda joǵary bilikti dárigerler qonaqtarǵa túrli qyzmetterdi usynady. Ár patsıenttiń jeke talaptary men medıtsınalyq kórsetkishterin tolyq eskere otyryp, tıimdi ońaltý jáne emdeý-saýyqtyrý baǵdarlamalary taǵaıyndalady. Demalýshylar kosmetologııa jáne estetıkalyq medıtsına ortalyǵynyń qyzmetterin paıdalana alady. Buǵan qosa, galokamerada (tuzdy úńgir) bolyp, SPA ortalyǵynda kúızelisten arylý terapııalaryn ala alady.
«Ǵımarattyń birinshi qabatynda resepshn ornalasqan. Munda saǵat 10:30–dan 12:30–ǵa deıin barlyq demalýshylarǵa fıtosháı jáne ottegi kokteıli usynylady. Fıtosháı men shóp sháı ártúrli shópterden jınaqtalyp ázirlenedi. Onyń quramynda gúl jáne qurǵaq japyraqtar, jemis, ósimdik tuqymdary bolady. Álbette, fıtosháı dárigerdiń nusqaýy boıynsha júrek-qantamyrlary, tynys alý organdary dertimen aýyratyndarǵa qoldanylady. Ol ońaltý, medıtsınalyq-qalpyna keltirý sııaqty emdeý keshenine kiredi», — dedi dáriger.
Sanatorıı dárigerleri patsıenttiń dıagnozyna sáıkes, emdeý josparyn ázirleıdi. Bul jerde kardıologtar, terapevtter, nevropatologtar, endokrınolog, dıetolog, fızıoterapevt, ýrolog, oftalmolog, stomatolog sııaqty medıtsına mamandary jumys isteıdi. Jalpy, 96 adam medıtsına qyzmetkeri eńbek etedi, onyń 29-y dáriger, 49-y orta, 18-i kishi medıtsınalyq personal.
«Fýnktsıonaldyq dıagnostıkaǵa keletin bolsaq, bizde barlyq organdardyń, býyndardyń, jumsaq tinderdiń ýltradybystyq zertteýi, Holter boıynsha EKG-niń táýliktik monıtorıngi, kardıogramma, spırografııa júrgiziledi. Sondaı-aq, bizdiń zerthana barlyq zamanaýı standarttarǵa saı keledi. Biz serologııalyq, bıohımııalyq, ımmýnofermenttik taldaýlar (IFA), check-up (chek ap) jasaımyz. ıAǵnı, bizdiń keshennen búkil zertteýler men keńesterdi alýǵa tolyq múmkindik bar», — dedi Saltanat Beısembaeva.
«Almaty Resort» shıpajaıyndaǵy fızıoterapııany erekshe atap ótýge turarlyq. Fızıoterapııa protsedýrasy kóptegen aýrýlardy emdeý úshin qoldanylatynyn kópshilik jaqsy biledi. Sanatorııdegi fızıoterapııa keshendi emdeý, aǵzany qalpyna keltirýdi jedeldetý, kóptegen derttiń aldyn alý, kóńil-kúıdi jaqsartý maqsatynda keńinen qoldanylady. Mysaly, SMT terapııasy (sınýsoıdaly modýlıatsııalanǵan tok), massajdyń ár túri: qurǵaq gıdromassaj, Karakalla vannalary, spa-kapsýlasy, mehanoterapııa (osy terapııanyń arqasynda bulshyqet, býyn aýrýlaryn emdeledi, sonymen qatar naýqastyń fızıkalyq jaı-kúıi jaqsarady) jáne jalpy massaj.
Zamanaýı keshendi emdeý dári-dármektermen qatar, tıisinshe durys tamaqtanýdy da qamtýy tıis. Arnaıy ázirlengen dıetalyq taǵamdar aǵzany tezirek qalpyna keltirýge kómektesedi. Qant dıabeti jáne semizdik sııaqty keıbir aýrýlarda dıeta ustaný emniń negizgi ádisi sanalady. Sondyqtan sanatorııdiń dıetology ár demalýshyǵa densaýlyq jaǵdaıyna baılanysty arnaıy mázir taǵaıyndaıdy.
Shıpajaıda úsh meıramhana bar. Olardyń jumys kestesi mynadaı: kún saıyn saǵat 09:00–den 10:00–ge deıin — tańǵy as, 11:00–de — qymyz terapııasy, 13:00–den 14:00–ge deıin — túski as, 16:00–de jeńil taǵamdar, 18:30–dan 19:30–ǵa deıin — keshki as. Birneshe saǵattan keıin qonaqtarǵa aıran usynylady.
«Biz qonaqtarymyzǵa ashyǵan qymyz beremiz. Nege? Óıtkeni, adam túrli em-sharadan ótkennen keıin sýyqtap qalmaýy tıis. Denesin jyly ustaý kerek. Qymyz ishki aǵzany qyzdyryp turady. Sonymen qatar, ishin túrli shlaktar men toksınderden tazalaıdy. Ashyǵan qymyzdyń paıdasy mol», — deıdi Kenje Narbaıuly tamaqtaný bóliminiń ákimshisi.
Shıpajaı Kazakh Nomad Resort tujyrymdamasyn engizdi. Onyń basty maqsaty — qazaq halqynyń baı mádenıetiniń elementterin, onyń dástúrlerin servıske, tamaq mázirine, zaldar men bólmelerdi bezendirý. Mysaly, sanatorııde ulttyq stılde jabdyqtalǵan sensorlyq bólme bar.
«Bul adamnyń qabyldaý, seziný júıelerin damytýǵa arnalǵan qurylǵylarmen jabdyqtalǵan arnaıy bólme. Munda jasalǵan jaǵdaı psıhıkalyq jáne moraldyq tynyshtyqta otyryp, adamnyń óz-ózimen jáne basqalarmen úılesimdikte bolýyna, júıke júıesin qalpyna keltirýge múmkindik beredi. Bul bizdiń emdeý baǵdarlamamyzǵa kiredi. Demalýshylar munda kirgende eldiń ásem jerlerine saıahat jasaǵandaı bolady. Bólme demalýǵa, tynyshtyqta jatýǵa jáne óz máselelerin umytýǵa arnalǵan. Adamdar munda kóp ýaqyt ótkizgisi keledi, biraq seans ýaqyty 15-30 mınýt», — deıdi shıpajaı dırektory Gúljanat Buǵybaeva.
Munda keshendi emdeý 10 kún júrgiziledi, bir adamǵa shaqqandaǵy quny kúnine 39 myń teńgeden bastalady. Bul somaǵa standart sanatyndaǵy eki orynǵa arnalǵan bólme, kúnine bes ret tamaqtaný, keshendi emdeý, basseın kiredi. Shıpajaıdyń turaqty kelýshileri bar. Solardyń biri professor, dıplomatııalyq qyzmettiń ardageri Qaırat Isaǵalıev.
«Bul shıpajaıdy qalyptasqan kezinen beri bilemin. Ony Dinmuhamed Qonaev qurǵany barshaǵa aıan. Qoldanysqa berilgenine 60 jyldan asty. Bul az ýaqyt emes. ıAǵnı, munyń ómirsheńdigi onyń ornalasqan jeri men kórsetetin qyzmetine baılanysty. Biz jyl saıyn jubaıymyzben birge emdelýge jáne demalýǵa kelemiz. Erekshe demalys orny. Ony sózben jetkizý múmkin emes, óz kózińmen kórip, sýyn iship, saf aýasymen demalý qajet», — deıdi Qaırat Isaǵalıev.
Sanatorıı basshysy Gúljanat Buǵybaevanyń sózinshe, qazir munda barlyǵy 300-den astam adam qyzmet etedi.
«Biz árbir patsıenttiń jeke talaptary men medıtsınalyq kórsetkishterin tolyq eskerip, tıimdi ońaltý jáne emdeý-saýyqtyrý baǵdarlamalaryn usynamyz. Óıtkeni, emdeý protsesindegi qamqorlyq pen jeke kózqaras — bizdiń medıtsınalyq jáne sanatorıı-kýrorttyq qyzmetterimizdiń basty artyqshylyǵy. Shıpajaı 135 orynǵa arnalaǵan. Jylyna 11500 adam kelip demalyp ketedi. Onyń ishinde 45 paıyzy aqyly, 50 paıyzy joldamamen keletin memlekettik qyzmetkerler jáne 5-10 protsenti mindetti áleýmettik medıtsınalyq saqtandyrýmen (MÁMS) keledi», - dep atap ótti ol.
