Almaty Open ATP 250 álemdegi úzdik týrnırlerdiń qataryna kirdi

ASTANA. KAZINFORM — Týrın qalasynda (Italııa) ATP Awards 2025 marapattaryn tapsyrý rásimi ótti. 

Qazaqstan tennıs federatsııasynan málim etkenindeı, oıynshylar Almaty Open jarysyn ATP 250 sanatyndaǵy jyldyń úzdik týrnırleriniń biri retinde baǵalady.

Sonyń nátıjesinde Almaty týrnıriniń uıymdastyrý komıteti Kásibı tennısshiler qaýymdastyǵynan (ATR) «Uıymdastyrýdaǵy úzdik sapa úshin» marapatyn aldy.

ATP (Asia/Pacific) halyqaralyq aımaǵynda sondaı-aq bul marapatqa Dýbaı (ATR 500) jáne Shanhaı (ATR 1000) týrnıri ıe boldy.

— Biz ATR-dan birinshi ret osyndaı joǵary marapatty alǵanymyzǵa óte qýanyshtymyz. Bul jetistik bizdiń oıynshylar úshin de, sonymen qatar jankúıerler úshin de joǵary deńgeıdegi sporttyq sharany uıymdastyrýǵa únemi umtylatynymyzdy kórsetedi. Týrnırge qoıylatyn joǵary talaptar — Qazaqstan tennıs federatsııasynyń prezıdenti Bolat Ótemuratovtyń uzaq merzimdi strategııasynyń bir bóligi, onyń negizgi maqsaty – Almaty Open mártebesin ATP 500 deńgeıine deıin jetkizý. Bul álemdik tennıs juldyzdaryn Qazaqstanǵa burynǵydan da kóbirek tartyp, elimizde sporttyń qanat jaıýy men damýyna oń áser etedi, — dedi Almaty Open ATP 250 týrnıri uıymdastyrý komıtetiniń basshysy jáne Qazaqstan tennıs federatsııasynyń vıtse-prezıdenti ıÝrıı Polskıı.

ATP Standards of Excellence Recognition (sapa standarttary) marapattary ár jarys ótkennen keıin oıynshylar arasynda júrgizilgen saýalnama nátıjesinde reıtıngisi eń joǵary týrnırlerge beriledi.

Qazirgi kezde ATP kásibı týrynda ATP 250 sanatyndaǵy 27 týrnır ótkiziledi. Ár jarystyń jeńimpazy 250 reıtıngilik upaıǵa ıe bolady. Almaty Open ATP 250-di qosqanda, 27 týrnırdiń ishinde altaýy ǵana Azııa/Tynyq muhıt aımaǵynda ótedi.

Eske sala keteıik, budan buryn álemdik reıtıngide Aleksandr Býblıktiń alǵash ret 11-orynǵa kóterilgenin jazǵan bolatynbyz.