Almaty oqýshylary sabaqta porno kórgen: Mektepterde baqylaý kúsheıtildi

ALMATY. QazAqparat - Almaty prokýrorlary mektep oqýshylarynyń sabaq ústinde pornografııalyq sıpattaǵy vıdeo kórip, synyptastaryn qorlaý deregine qatysty túsinik bildirdi, dep habarlaıdy QazAqparat tilshisi.

Buǵan deıin áleýmettik jelilerde qaladaǵy oqý oryndarynyń birinde oqýshylardyń sabaqta anaıy vıdeo kórip jatqany týraly málimet taraǵan bolatyn.

Osyǵan baılanysty Almaty qalasynyń prokýratýrasy jalpy bilim beretin mektep oqýshylarynyń tyıym salynǵan aqparattan qorǵalǵandyǵyna taldaý jasady. Belgili bolǵanyndaı, vıdeo 2022 jyldyń qańtarynda túsirilgen.

«Mundaı saıttardy buǵattaý boıynsha organdardyń qabyldap jatqan sharalaryna qaramastan, is júzinde kún saıyn jańalary qurylyp jatyr. Osyny eskere otyryp, Almaty qalasynyń prokýratýrasy osyndaı kontentke monıtorıng júrgizý jáne olardyń oqýshylar arasynda taralýyna jol bermeý jónindegi jumysty kúsheıtip, qaıta qaraýdy usyndy», - dep habarlady qalalyq prokýratýradan.

Prokýrorlyq qadaǵalaý aktisi boıynsha Bilim basqarmasy arnaıy buıryq qabyldady.

«Oǵan sáıkes «Bilim berýdegi jańa tehnologııalardyń qalalyq ǵylymı ádistemelik ortalyǵy» KMM-ge monıtorıng júrgizý jáne «qara tizimdi» qalyptastyrý mindeti júkteldi. Anyqtalǵan tyıym salynǵan saıttar «School net» korporatıvtik jelisine engiziledi. Bul oqýshylardyń jaǵymsyz kontentke qoljetimdiligin barynsha azaıtýǵa múmkindik beredi», - dep atap ótti qadaǵalaý organynan.