Almaty oblysynyń turǵyndary Jeńis kúnin qalaı atap ótti
9 Mamyrǵa arnalǵan baǵdarlama aldymen Ortalyq mádenıet jáne demalys saıabaǵyndaǵy «Dańq» obelıskisine gúl shoqtaryn qoıý rásiminen bastaldy. Oblys ákimi Amandyq Batalov bastaǵan áskerıler, ardagerler men qala jurtshylyǵy Máńgilik alaý aldynda qaza bolǵan jaýyngerler rýhyna taǵzym etti.
Sondaı-aq «Batyrlarǵa taǵzym» sherýinde maıdangerlerdiń sýretterin ustap shyqqan 1 myńnan astam adam qalanyń ortalyq kóshesimen júrip ótti. 
Al «Jastar» saıabaǵy sahnasynda teatrlandyrylǵan kórinis qoıyldy. Onda Otan týraly ánder aıtylyp, maıdan dalasyndaǵy áskerı ómir beınelendi.
Munan soń jetisýlyqtardy 9 Mamyr merekesimen quttyqtaǵan oblys ákimi Ekinshi dúnıejúzilik soǵys ótken tarıhymyzdyń taǵdyrly da, qasiretti kezeńi ekenin atap ótti.
«Ómir men ólim aıqasqan sol bir jyldary bizdiń aǵa urpaq Otan qorǵaý jolynda kózsiz erlik pen batyrlyqtyń úlgisin kórsetti. «Júk aýyryn nar kóteredi, el aýyryn er kóteredi» deıdi babalarymyz. Jaýjúrek ul-qyzdarymyzdyń jeńisti jolynyń arqasynda aýyr da, azapty jyldar artta qaldy. Biz búgin, táýelsiz elde Jeńis merekesin zor qýanyshpen qarsy ala otyryp, urys dalasynan oralmaǵan maıdangerler rýhyna taǵzym etip, qaharmandar aldynda bas ıemiz», - dedi A. Batalov.
Sonymen qatar óńir basshysy Jeńistiń 74 jyldyǵyna oraı oblystyq bıýdjetten soǵys ardagerleriniń árqaısysyna 500 myń teńgeden birjolǵy materıaldyq kómek kórsetiletinin, bıylǵy jyly soǵys ardagerleri men basqa da sanattaǵy azamattardyń densaýlyǵyn túzeýge 470 mln teńgege jýyq qarjy bólingenin tilge tıek etti. Sondaı-aq osyndaı qamqorlyq pen qurmet únemi jalǵasyn tabatynyn aıtty.
Keshte qazaqstandyq estrada juldyzdary, Súıinbaı atyndaǵy fılarmonııa ártisteri men Taldyqorǵan áýenderi folklorlyq-etnografııalyq ansambliniń ánshileri óz ónerlerimen saıabaqqa kelgen kópshilikke merekelik kóńil-kúı syılady.
Saıabaq alańynda shatyrlar qurylyp, qalaǵan jandar dala ashanasynan dám tatty. Oblys ákimi Amandyq Batalov ta soǵys ardagerlerimen birge dala ashanasyna kirip, áńgime-dúken qurdy.
Merekeli sharanyń sońy «Taldyqorǵan» ıppodromynda ulttyq at sporty jarystaryna ulasty.
Eske salsaq, mereke keshkilik «Uly erlik shattyǵy» atty bı baǵdarlamasymen, kógildir ot shashýmen túıindelmek.
Jalpy, Ekinshi dúnıejúzilik soǵysqa Jetisý jerinen 120 myńnan astam adam qatysyp, olardyń 50 myńy týǵan jerine qaıtpaǵan. Jetisýlyq 52 jaýynger Keńes Odaǵynyń Batyry ataǵyna ıe boldy. Esimderi ańyzǵa aınalǵan 28 gvardııashy-panfılovshy batyrlardyń 10-y - Almaty oblysynan. Almaty oblysynda búgingi kúni 91 soǵys ardageri, 10 myńnan astam tyl eńbekkeri turady.
