Almaty oblysynyń ákimi sahnada án shyrqady
Ystyq tilegin, quttyqtaýyn jetkizgennen keıin óńir basshysy án shyrqady. Onyń sahna tórinde kórsetken ónerine jınalǵan jurtshylyq tánti boldy, dep habarlaıdy QazAqparat tilshisi.
«Bul Jeńis bizdiń batyr ákelerimiz ben atalarymyzdyń qaharmandyq erliginiń, tyl eńbekkerleriniń qajyrly eńbeginiń arqasynda múmkin boldy. Bul qasterli Jeńis kúni - aǵa urpaqtyń óshpes erliginiń, eren eńbeginiń máńgilik sımvoly! Búgingi Táýelsizdik tuǵyrynyń berik, eńsemizdiń bıik bolýy da, elimizdiń órkendeýi de - Uly Jeńistiń jemisi. Otan úshin janyn pıda etken jaýyngerlerimizdi jyl saıyn eske alyp, olardyń rýhyna taǵzym etý bizdiń, ıaǵnı keıingi urpaqtyń eń basty paryzy» ekenin atap ótken A.Batalov, sóziniń sońynda ardagerlerdiń qurmetine arnap Vladımır Vysotskııdiń sózine jazylǵan «On ne vernýlsıa ız boıa» atty ándi oryndap berdi.
Almaty oblysynan Ekinshi dúnıejúzilik soǵysqa 120 myń sarbaz attandy. Onyń teń jartysy oralmady. Qazirgi tańda Jetisý óńirinde 190 soǵys ardageri men 13 myń tyl eńbekkeri bar. Taldyqorǵanda Uly Jeńistiń 72 jyldyǵyn merekeleý Dańq eskertkishine gúl shoqtaryn qoıýdan bastaldy. Óńir basshylarymen birge soǵys ardagerleri, tyl eńbekkerleri, qoǵamdyq uıym ókilderi soǵystan qaıtpaı qalǵan sarbazdardy bir mınýttyq únsizdikpen eske aldy.
Jeńis kúnine arnalǵan sharalar Jastar saıabaǵynda óz jalǵasyn tapty. Qala turǵyndary men qonaqtaryna teatrlandyrylǵan qoıylymdar usynyldy. Sondaı-aq ulttyq at sporty oıyndary ótti.
Keshke merekelik sharalar kontsertpen jáne otshashýmen aıaqtalady. 
