Almaty oblysynda Joldaýdan týyndaıtyn mindetter belgilendi
A. Batalov Prezıdenttiń bul Joldaýy osyǵan deıin júzege asyrylyp jatqan strategııalyq bastamalardyń zańdy jalǵasy ekenin atap ótti. Ár otbasynyń, árbir adamnyń jaǵdaıyn, tirshilik ortasyn jaqsartýǵa arnalǵan Joldaýdy oryndaýǵa jergilikti atqarýshy organdar búginnen bastap kirisýi kerektigin qadap aıtty.
Almaty oblysy ákiminiń baspasóz qyzmetinen habarlaǵandaı, Kóksý aýdanyndaǵy Q. Jalaırı atyndaǵy mektep-gımnazııa dırektorynyń orynbasary Aıdyngúl Nurdáýletova Joldaýda aıtylǵan pedagogtardyń mártebesin anyqtaý - sheshimin kópten kútken másele ekendigin jetkizdi. Sonymen qatar jyldyń basty qujatynda úsh aýysymdy mektepter problemasyn sheshýge de erekshe nazar aýdarylǵany qýantady. «Ótken jyly oblysta «Nurly jol» baǵdarlamasymen 33 mektep salynsa, bıyl 9 jańa mektep paıdalanýǵa berilgen. Sizder mektep salyp bere berseńizder, biz qansha bala bolsa da oqytýǵa qýana kirisemiz», - dedi A. Nurdáýletova.
Sol sııaqty oblystyq perınataldy ortalyqtyń dárigeri Elena Osıpova medıtsınalyq qyzmet kórsetý sapasyn arttyrýda, densaýlyq saqtaý salasyn tsıfrlandyrýda ózderine júktelip otyrǵan mindettiń zor ekenin aıtty. Sondaı-aq oǵan qol jetkizýge oblysta barlyq múmkindikter jasalyp otyrǵanyn jáne soǵan sáıkes sapaly jumys isteıtindikterin atap ótti.
Jıynda, sondaı-aq aýyl sharýashylyǵy, sport, jastar isi salalary boıynsha da mamandar sóz alyp, Joldaýǵa qatysty óz oı-pikirlerin bildirdi.
Munan soń Joldaý tapsyrmalaryna oraı qaı salada qandaı mindetter kútip turǵany, qaı baǵyttarǵa basymdyq berilýi tıistigi jaıynda oblys ákimi A. Batalov naqty mindetterdi belgilep berdi.
Oblys basshysynyń aıtýynsha, Ekonomıka jáne bıýdjettik josparlaý basqarmasy qysqa merzimde Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn iske asyrý jónindegi is-sharalar josparyn ázirlep, sol jospar basshylyqqa alynatyn bolady.
Bıylǵy Joldaýda «Bıznestiń jol kartasy-2020» baǵdarlamasyn jyl saıyn somasy 30 mlrd teńgege qosymsha qarjylandyra otyryp, 2025 jylǵa deıin uzartý tapsyrylǵan bolatyn. Máselen, baǵdarlama bastalǵannan beri oblys kásipkerleri úshin 1219 jobany iske asyrýǵa 30,6 mlrd teńgege qoldaý kórsetilgen, jeti myń segiz júz jumys orny ashylyp, 26 myń jumys orny saqtalǵan. Sonyń nátıjesinde shaǵyn jáne orta bıznes sýbektileriniń sany 115 myńnan asyp, jergilikti bıýdjettegi úlesi bir jyl ishinde 39 protsenten 53 protsentke ósken, al jalpy óńirlik ónimde jyl sońynda 28 protsentti quraıdy.
Elbasy tapsyrmasyna sáıkes aktıv jıynynda oblys ákiminiń orynbasary J. Tuıaqovqa, kásipkerlik basqarmasyna óńir kásipkerlerine qoldaý kórsetý maqsatynda qosymsha qarjy alý úshin naqty sharalar qabyldaýdy tapsyryldy.
«Aýyl sharýashylyǵynda oblys jaqsy kórsetkishterge jetip keledi. Qant qyzylshasy, júgeri ósirý, óńdeý isin jolǵa qoıdyq. Alaıda biz osy jetistikterimizben toqtap qalmaýymyz kerek. Sondyqtan bir aı ishinde oblystaǵy AÓK damytýdyń óńirlik baǵdarlamasyn ázirlep, bekitip, baǵdarlama ishine 9 basym baǵytty belgileýdi tapsyramyn. Sonyń ishinde, etti-sútti mal sharýashylyǵy, qoı sharýashylyǵy, basymdyq beriletin daqyldar, ıntensıvti baqtar, jylyjaı sharýashylyqtary jáne taǵy basqasy bar», - dep atap ótti A. Batalov.
Sonymen qatar bilim berý mekemelerin beınebaqylaýmen qamtamasyz etý, apatty jáne úsh aýysymdy mektepter máselesin sheshýge qatysty da naqty mindetter júkteldi. Máselen, ishki mıngratsııa men demografııalyq ósimniń nátıjesinde úsh aýysymda oqytatyn burynnan bar mektepterdiń qataryna ótken jyly 11 mektep qosylsa, bıyl taǵy 13-i qosylyp otyr, sóıtip olardyń sany qazirgi kezde 34-ti quraıdy.
«Oblys ákiminiń birinshi orynbasary L. Turlashov pen tıisti basqarmalarǵa 15 mekteptiń jobalyq-smetalyq qujattaryn daıyndaýdy aıaqtaýdy, jańa 11 úshaýysymdy mekteptiń qujattaryn ázirleýdi tapsyramyn. 11 mekteptiń qujattaryn ázirleýge qajetti qarjyny jýyq arada ótetin bıýdjetti naqtylaý kezinde qarastyrýymyz kerek. Elimizde «7-20-25» baǵdarlamasy bastaldy, alaıda bizdi áli kúnge deıin satyp alýshylardyń tolyq pýly qalyptastyrylmaǵan. Ekinshi deńgeıli bankter somasy 849 mln.teńgege 73 ótinim ǵana qabyldaǵan, onyń 53-i maquldanyp, 4 páter berilgen. Sondaı-aq, «Nurly jer» baǵdarlamasy sheńberinde jaldamaly jáne nesıelik turǵyn úılerdiń iske qosylýyn ulǵaıtý qajet. Oblys ákiminiń orynbasarlary L. Turlashov pen A.Baıjanovqa turǵyn úı salý úshin jeke ınvestorlar tartý máselesin pysyqtaýdy, sondaı-aq jeńildetilgen ıpoteka boıynsha alǵashqy jarnany ishinara sýbsıdııalaý boıynsha usynys engizýdi tapsyramyn», - dedi oblys basshysy.
Oǵan qosa jıyn barysynda polıtsııa qyzmetiniń jumysyn jetildirý, medıtsına salasyn tsıfrlandyrý, bıýdjettik qyzmetkerlerdiń jalaqysynyń ósýine baılanysty qajetti qarjyny 2019 jyldyń bıýdjetinde qarastyrý, turǵyn úı-kommýnaldyq sharýashylyq pen tabıǵı monopolııalar qyzmetteri úshin tarıfterdiń belgilenýi men jınalǵan qarjyny jumsaýdyń ashyqtyǵyn qamtamasyz etý, týrızmdi damytý boıynsha arnaıy uıym qurý týraly usynys engizý, bir aı merziminde memlekettik apparatta ońtaılandyrý júrgizip, kelesi jyldyń basynan eńbekaqy tóleýdiń jańa modelin engizý, oblys ekonomıkasyna ınvestorlar tartý, «Nurly jol» jáne «Nurly jer» baǵdarlamalaryn iske asyrý merziminiń 2025 jylǵa deıin uzartylýyna oraı eldi mekenderdiń perspektıvalyq damý josparlaryn eskere otyryp, qosymsha ınfraqurylymdyq jobalar tizbesin qurý júkteldi. Sonymen qatar kelesi jyldyń Jastar jyly bolyp jarııalanýyna jáne «Aýyl - El besigi» arnaıy jobasynyń iske qosylýyna baılanysty da mindetter aıqyndaldy.
«Joldaýdy halyq arasynda túsindirý óńirde qurylǵan aqparattyq nasıhat toptarynyń jumysy bolsa, naqty iske asyrý - jergilikti atqarýshy organdardyń mindeti. Sondyqtan oblysta daıyndalǵan jospardyń ár tarmaǵy boıynsha tıisti aımaqtar men salalar basshylary tyńǵylyqty jumys atqarýy tıis jáne bul úshin ár basshy derbes jaýap beredi», - dedi A. Batalov.
Foto: Dmıtrıı Erofeev
