Almaty oblysynda zań aptalyǵy bastaldy

TALDYQORǴAN. QazAqparat - Almaty oblystyq kásipkerler palatasynyń uıymdastyrýymen óńirde Konstıtýtsııa kúnine oraı «Negizgi zań aptalyǵy» bastaldy. Aptalyqtyń ashylý rásimine QR Parlamenti Májilisiniń depýtaty Omarhan Óksikbaev qatysty, dep habarlaıdy QazAqparat tilshisi.

Aptalyqtyń basty maqsaty - óńirdegi kásipkerlerge jáne kásibin endi bastaǵaly otyrǵan azamattarǵa aqparattyq-quqyqtyq keńester berip, isteriniń zańdy turǵyda júrgizýine kómektesý. Sondaı-aq kásipkerlik salasynda táýekelge bel býǵan azamattarǵa baǵyt-baǵdar kórsetip, bıznestiń san-alýan túrleri men baǵyttary boıynsha da málimet berip qoldaý jasaý. Birneshe kún boıy bıznes-keńesshiler qabyldaýlar ótkizip, vebınar, onlaın-keńester júrgizetin bolady. Semınarlarda zańgerler jas kásipkerlerge salyq zańnamalary, qyzmet kórsetý salasyndaǵy zańdar men normatıvter boıynsha aqparat beredi. Jalpy Jetisý óńirinde jastar sany 500 myńǵa jýyq bolsa, olardyń 26 paıyzy orta jáne shaǵyn bızneste óz qabiletterin baıqaýda.

Aptalyqtyń ashylý rásiminde Májilis depýtaty Omarhan Óksikbaev oblystyq kásipkerler palatasynyń da tynys-tirshiligimen tanysty. Halyq qalaýlysy qazirgi jumys istep turǵan jáne jańa bastaǵan bıznesmenderdi qoldaýdaǵy Almaty Kásipkerler palatasynyń mańyzdy rólin atap ótti.