Almaty oblysynda táýligine 50 myń kólik júretin jol keńeıtilmek

ASTANA. QazAqparat - «Almaty - Bishkek» avtojolynyń 786-790 shaqyrymy ýchaskesin, ıaǵnı «Altyn Orda» bazary mańyndaǵy 3,8 shaqyrymdyq jol keńeıtiletin bolady, dep habarlaıdy Almaty oblysy ákiminiń baspasóz qyzmeti.

Osy mańdaǵy kólik keptelisin sheshý úshin oblys ákimdiginiń usynysymen úkimet tarapynan qoldaý tapqan aýqymdy joba bıylǵy jyly júzege asyryla bastaıdy. Kúrdeli jóndeý barysynda jol ústi kópirleri men jol burylystary da qarastyrylmaq. Bul týraly keshe jýrnalısterge bergen suhbatynda oblys ákiminiń orynbasary Aıdarbek Baıjanov aıtty. 

 «KazAvtoJol» mekemesiniń Almaty oblystyq fılıaly dırektorynyń orynbasary Nurhat Aqyltaevtyń aıtýynsha, «Altyn Orda» bazary mańyndaǵy avtojol arqyly táýligine 50 myń avtokólik júredi. Mundaǵy keptilis máselesin sheshý maqsatynda atalmysh joldyń 16-19 shaqyrymdary aralyǵy 8 jáne 10 jolaqty bolmaq. Onyń eki jolaǵy tranzıttik kólikterge arnalsa, eki jolaǵy jergilikti mańǵa júretin kólikterge, al bir jolaǵy avtobýsqa, ıaǵnı qoǵamdyq kólikke arnalady. 16-shy shaqyrymda burylys estakadasy qarastyrylady.

«Almaty - Bishkek» avtokólik jolynyń 786-790 shaqyrym ýchaskesi bóligin keńeıtýdiń buǵan deıingi jobasyna bıylǵy jyly birqatar tolyqtyrýlar engizilgen bolatyn. Atap aıtqanda, jobanyń ekinshi kezeńinde 18 myń turǵyny bar «Asyl Arman» TK turǵyndarynyń ótinishi boıynsha atalmysh keshennen qalaǵa burylatyn «Trýba» tıpti jer ústi joly salynsa, sonymen qatar Raıymbek aýyly tusynda taǵy bir joba boıynsha tórtinshi jer ústi joly qarastyrylatyn bolady. Jobanyń eki kezeńiniń de jobasyn «AstanaStroıProektServıs-M» JShS daıyndaýda. Tamyz aıynyń sońyna deıin «MemSaraptama» mekemesiniń oń qorytyndysy shyǵady dep josparlanǵan. Jobany tolyq júzege asyrýdyń aldyn ala esepteý boıynsha quny 12 mlrd. teńgege jýyq dep jobalanyp otyr. Bıylǵy jylǵa 800 mln. teńge bólingen. Kúrdeli jóndeý jumystary 2019 jyly tolyǵymen aıaqtalady dep kútilýde.

Jobany iske asyrý maqsatynda memleket qajettiligi úshin jer telimderin alý jumystary júrgizilýde. Alýǵa jatatyn oblys aýmaǵyndaǵy 53 ýchaske bolsa, búgingi kúnge sonyń 5-eýi memlekettik jer ýchaskesi, 30-y alynǵan, 13-inde alý protsesi júrip jatyr, al 5 jer ýchaskesiniń ıelerimen kelissózder júrgizilýde.

Oblys ákiminiń orynbasary kúrdeli jóndeý jumystary kezinde sol mańdaǵy irgeli nysandardyń jumysyna kedergi keltirmeýdi, ýaqytsha joldardyń baǵytyn kelisip jasaýdy tapsyrdy.

«Bul joba óz kezeginde kólik keptelisin sheshýge, jaıaý júrginshilerdiń qaýipsizdigine oń yqpalyn tıgizetin bolady», - dedi A. Baıjanov.