Almaty oblysynda qytaılarǵa jer berildi degen aqparat shyndyqqa janaspaıdy - ákimdik
«Áleýmettik jelilerde Saryózekten Jarkentke deıin jer qytaı kompanııasyna berildi jáne ol kompanııada 700 qytaı azamaty jumys isteıdi degen qaýeset tarady. Osy jaıtqa baılanysty túsinikteme jumystaryn júrgizdik. Aýyldyń aqsaqaldaryn alyp, sol zaýyttyń jumysyn kórsettik. Ol jerde Almaty oblysynyń ártúrli aımaqtarynan kelgen 100-ge jýyq qurylysshymen qatar 125 qytaılyq azamat jumys isteıdi. Óıtkeni, zaýyttaǵy qurylǵylardyń bári Qytaıda shyǵarylǵan. Qytaılyq ınjenerler jergilikti jumysshylarǵa zaýyt tehnologııasyn kórsetip, úıretkennen keıin óz elinderine qaıtarylady», - dedi Ǵalymurat Júkel.
Baspasóz hatshysynyń aıtýynsha, Almaty oblysynyń Kerbulaq aýdanyndaǵy «Saryózek-Kóktal» tas jolynyń boıynda Qazaqstan men Sıngapýr kásipkerleri birigip, tsement shyǵaratyn zaýyt salyp jatyr. Birlesken seriktestiktiń 60 paıyzy qazaqstandyq kásipkerge tıesili bolsa, qalǵan 40 protsenti sıngapýrlyq ınvestorlardyń enshisinde. Qurylysy júrip jatqan kásiporyn 2019 jyly iske qosylady dep josparlanýda. Jylyna 1,2 mıllıon tonna tsement shyǵaratyn zaýytqa 50 mıllıard teńgeniń ınvestıtsııasy tartylýda.
«Qazirgi tańda Almaty oblysy respýblıka boıynsha tsement óndirýden sońǵy oryndardyń birin alyp tur. Bul jobanyń jaqyn arada júzege asyrylýy oblystyń tsement tutyný boıynsha birinshi orynda turǵanyn eskere otyryp, Almaty oblysynyń osy salada jetekshi oryndarǵa shyǵýyna múmkindik beredi dep úmittenemiz. Sonymen qatar, qurylys aıaqtalǵannan keıin, bizdiń kásiporyn tsement shyǵaryp, onda 387 jańa jumys orny paıda bolady. Zaýytqa jumysshylardy Kerbulaq, Kóksý aýdandary men Qapshaǵaı qalasynan alynsa dep josparlanýda. Jylyna 2 mlrd. teńgege jýyq salyq tólenedi dep kútilýde», - deıdi «Alacem» tsement óndirý zaýytynyń bas dırektorynyń orynbasary Stanıslav Şerbakov.
