Almaty oblysynda Konstıtýtsııa kúni qarsańynda 150-den astam shara ótedi

TALDYQORǴAN. QazAqparat - Almaty oblysynda Qazaqstan Respýblıkasynyń Konstıtýtsııa kúni qarsańynda 150-den astam mádenı-kópshilik shara josparlanǵan. Aldaǵy kúnderi túrli áleýmettik jáne kásipkerlik nysandar ashylmaq, dep habarlaıdy QazAqparat tilshisi.

Jetisýlyqtar Ata zańymyzdyń 23 jyldyǵyn ártúrli baǵyttaǵy sharalarmen atap ótpek.

«152 is-sharaǵa barlyǵy 200 myń adam qatysady», deıdi oblystyq ishki saıasat basqarmasynyń basshysy Rýstam Alpysbaev.

Onyń sózinshe, Taldyqorǵan qalasynda 2 birdeı jańa mektep, Eskeldi aýdanynda sporttyq alań, Qarasaı aýdanynda sport mektebi, Qaratal aýdanynda kommýnaldyq bazar, Alakól aýdanynda saýyqtyrý kesheni, Jambyl aýdanynda jańa kóshe, Eńbekshiqazaq jáne Eskeldi aýdandarynda balabaqshalar ashylmaq.

Basqarma basshysy birqatar nysandar qazirdiń ózinde paıdalanýǵa berilip jatqandyǵyn atap ótti.

Máselen Eskeldi aýdanynyń ortalyǵy Qarabulaq aýylynda 100 oryndyq bóbekjaı esigin aıqara ashty. Mektepke deıingi mekemeni aýdandaǵy irgeli sharýashylyqtardyń biri «Hılnıchenko jáne K» komandıttik seriktestigi iske qosty. Sol sııaqty Úsharal qalasynda «Tarlan» saýyqtyrý kesheni ashyldy. Alakól aýdanynan shyqqan atymtaı jomart azamattar jańa keshendi barlyq qajet zamanaýı qural jabdyqtarmen qamtamasyz etti.