Almaty oblysynda brakonerlikpen aınalysqan ormanshy ustaldy
Almaty oblystyq Polıtsııa departamenti baspasóz qyzmetiniń málimetinshe, «Ýyldyryq shashý» jedel-aldyn alý sharasy aıasynda Kegen aýdandyq polıtsııa bóliminiń qyzmetkerleri Qarqara aýyldyq okrýgindegi «Sharqudyq» dep atalatyn ýchaskede 30 jastaǵy orman sharýasynyń zańsyz áreketterin áshkereledi. Onyń úı-jaıynnan 2 dana ańshylyq atys qarýy, sondaı-aq 14 dana oq-dári jáne jabaıy janýardyń, shamamen eliktiń eti tárkilendi. Qarýdyń biri tirkelmegeni jáne esh qujattary joqtyǵy anyqtaldy.
«Ekologııalyq quqyq buzýshylyqtar eń kóp latenttik dárejege ıe. Olardyń kóbi kórinbeıtin jaǵdaıda jasalady. Alaıda biz olardy anyqtaý boıynsha jumystardy belsendi júrgizýge jáne ekologııalyq, tabıǵatty qorǵaý is-sharalaryn jıi ótkizýge tyrysamyz. Barlyq azamattardy zańdy buzbaýǵa, brakonerlermen, tabıǵatqa zalal keltirýshilermen kúreste quqyq qorǵaý organdaryna kómek kórsetýge shaqyramyz», - deıdi Almaty oblysy Kegen aýdandyq polıtsııa bóliminiń bastyǵy Erlik Ýrkınbaev.
Atalǵan derek QR QK 337-baby boıynsha SDTBT-da (Zańsyz ań aýlaý) tirkeldi. Tárkilengen janýardyń eti bıologııalyq saraptamaǵa jiberildi. Kúdiktige qatysty sotqa deıingi tergeý amaldary júrgizilýde.
Aıta keteıik, 16 sáýirde bastalǵan «Ýyldyryq shashý» jalpyrespýblıkalyq jedel-aldyn alý is-sharasynyń barysynda Almaty oblysynyń quqyq qorǵaý organdary tabıǵatty qorǵaý zańnamasyn buzǵan 72 quqyq buzýshyny anyqtady. Onyń ishinde 49 derek – zańsyz balyq aýlaý, 18 - zańsyz ań aýlaý, 5 - zańsyz aǵash kesý jáne ósimdikter jınaý. Reıd barysynda 300 kg-dan astam balyq, 2 jabaıy janýardyń eti, 5 rezeńke qaıyq, balyq jáne ań aýlaıtyn 29 qural, 3 birlik atys qarýy, jeliler, motorlar, akkýmýlıatorlar, shanshý quraldary, ilmekti quraldar jáne ózge de quraldar tárkilendi.