Almaty oblysynda 9 872 túlek UBT tapsyrady
Jıynda UBT-ǵa daıyndyq jáne ony ótkizý týraly jáne mindetti áleýmettik medıtsınalyq saqtandyrý (MÁMS) júıesin oblys kóleminde engizýge qatysty aqparattyq-túsindirý jumystary máseleleri qaraldy, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Oblystyq bilim basqarmasynyń basshysy Lázzat Bazarqulova óńirde UBT 20-shy maýsymda bastalyp, 25-shi maýsymǵa deıin jalǵasatynyn aıtty.
L. Bazarqulovanyń habarlaýynsha, oblystaǵy 14268 túlektiń 9872-si UBT-ǵa kiredi. Erteń testileý óńirdiń 6 aýdanynda - Aqsý, Qarasaı, Jambyl, Іle, Balqash, Talǵar aýdandary men Qapshaǵaı qalasynda bastalady. Testileý pýnktterinde 142 aýdıtorııa daıyndalyp, 19-y rezervke ázirlengen. Túlekterdi tasymaldaý, jatyn orynmen, tamaqpen qamtamasyz etý sharalary qarastyrylǵan. Qazirgi kezde oblystyń barlyq aýdandary men qalalary testileýge tolyǵymen daıyn.
Ekinshi másele boıynsha oblystyq densaýlyq saqtaý basqarmasynyń basshysy Ashan Baıdývalıev baıandama jasady. Ol oblysta MÁMS-ni engizýge baǵyttalǵan aqparattyq nasıhat jumystaryna toqtala kele, óńirde atalmysh saqtandyrý isine 664 medıtsınalyq uıym tartylǵanyn, onyń 659-y memlekettik, 5-eýi jekemenshik ekenin atap ótti. Dárigerler men medıtsına mamandaryn oqytýmen qamtý 100% qurap otyr. Qazirgi kezde «Emhanaǵa tirkel de, óz mártebeńdi anyqta» atty aktsııa aıasynda turǵyndardyń turǵylyqty jeri boıynsha medıtsınalyq uıymdarǵa bekitilý deńgeıi 82%-ke jetken. Al 30 maýsymǵa deıin qamtý deńgeıin 100%-ǵa jetkizý josparlanǵan. Bul oraıda mártebesin anyqtaý deńgeıi - 99,9 %.
Oblys ákiminiń orynbasary Jaqsylyq Omar UBT asa mańyzdy belestiń biri bolǵandyqtan ony sapaly, durys ótkizýge bar kúsh-jigerdi jumsaý qajettigin atap ótti.
«Búgingi kúni bilim alý, bilimdi bolý - eń basty sharttardyń biri. Túlekterimizdiń joǵarǵy oqý oryndaryna túsip, sapaly bilim alǵany, myqty maman bolyp, qoǵamnyń damýyna úles qosqany - biz úshin asa mańyzdy másele. Bul rette UBT - bolashaqqa nyq qadam jasaýdyń bir kezeńi. Sondyqtan bul máseleni baqylaýda ustap, testileýge kirgen balalarǵa da, ata-analarǵa da qolaıly jaǵdaı jasaýǵa nazar aýdarýymyz kerek», - dedi J.Omar.
«MÁMS boıynsha aqparattyq-nasıhat jumystarynyń nátıjeleri jaman emes. Bul baǵyttaǵy jumysty osy qarqynmen jalǵastyryp, maýsym aıynyń sońyna deıin halyqtyń emhanalarǵa bekitilý deńgeıin 100 %-ke jetkizýimiz kerek. Sondyqtan shtabtardyń jumysyn jáne aqparattyq-nasıhat jumystaryn belsendi túrde júrgizińizder», - dedi oblys ákiminiń orynbasary.
