Almaty oblysynda 8 páterli úı janyp ketti: 24 adam qonaqúıge ornalastyrylady

ZAREChNYI. QazAqparat – Almaty oblysynyń Zarechnyı kentinde 8 páterli úı órtenip ketti. Oblys ákiminiń tapsyrmasymen baspanadan aıyrylǵan 24 adam, onyń ishinde 10 bala qonaqúılerge ornalastyrylatyn bolady. QazAqparat bul týraly Tótenshe jaǵdaılar mınıstrligine silteme jasap habarlaıdy.

«17 tamyz kúni saǵat 03:57-de Almaty oblysynyń Tótenshe jaǵdaılar departamentiniń órt sóndirý bólimsheleri Qonaev qalasy Zarechnyı aýylyndaǵy Shkolnaıa kóshesinde ornalasqan 8 páterli turǵyn úıdegi órt boıynsha shaqyrýǵa shyqty.

Saǵat 04:21-de órt sóndirýshiler kelgen ýaqytta úıdiń shatyry men ekinshi qabaty janyp, artynsha shatyr opyrylǵany anyqtaldy.

Órt týraly habarlama kesh túskendikten ony sóndirý jumystary qıyndady. Qonaev qalalyq órt sóndirý bóliminen oqıǵa ornyna deıingi qashyqtyq 20 shaqyrymdy quraıdy», - delingen aqparatta.

Qutqarýshylar kelgenge deıin 15 adam óz betimen evakýatsııalanyp úlgergen, onyń ekeýi jaraqat aldy.

Jalyn saǵat 05:10-da oqshaýlandyrylyp, saǵat 7:20-da tolyqtaı joıyldy.

Ottyń tutaný sebebi anyqtalyp jatyr. Oqıǵa ornyna Almaty oblysy Tótenshe jaǵdaılar departamentinen 10 qyzmetker men 3 tehnıka jumyldyryldy.

«Órtke qarsy qyzmet organdarynyń qyzmetkerleri óz ómirin qaýipke tigip, gaz ballondaryn alyp shyqty.

Almaty oblysynyń ákimi Marat Sultanǵazıev órt ornyna baryp, zardap shekken turǵyndarmen kezdesti (24 adam, onyń ishinde 10 bala). Qonaev qalasynyń ákimine zardap shekkenderdi Qonaev qalasyndaǵy qonaqúıge ornalastyrýdy tapsyrdy. Jergilikti atqarýshy organdar zańnamada belgilengen tártipte órtten zardap shekkenderge keltirilgen zalaldy óteý jóninde sharalar qabyldaıtyn bolady», - delingen TJM málimetinde.