Almaty oblysynda 10 kúnde brakonerliktiń 159 faktisi tirkeldi

TALDYQORǴAN. QazAqparat - Aqpannyń 15-26 kúnderi aralyǵynda Almaty oblysynda brakonerlermen kúres júrgizildi. 11 kúnniń ishinde túrli zańsyzdyqtyń 159 faktisi anyqtaldy, dep habarlaıdy QazAqparat tilshisi.

«11 kúnniń ishinde tabıǵat qorǵaý zańnamalaryn buzýdyń 159 faktisi tirkeldi. Onyń 109-y zańsyz ań aýlaý, 20-sy balyq aýlaý, 24-i aǵashtardy kesýge qatysty faktiler», - dedi Almaty oblystyq Polıtsııa departamentiniń Jergilikti polıtsııa qyzmeti basqarmasynyń basshysy Baǵdat Áshimov.

Vedomstvonyń málimetinshe, atalǵan isterdiń 8-i boıynsha qylmystyq óndiris qozǵalǵan.

«Brakonerliktiń aldyn alý is sharasy barysynda 870 keli zańsyz aýlanǵan balyq, eki qaıyq, qujaty joq 5 ańshy myltyǵy tárkilendi», - dep tolyqtyrdy B. Áshimov.