Almaty oblysynan tabylǵan arystannyń qazirgi jaǵdaıy belgili boldy
Ekologııa mınıstrliginiń baspasóz hatshysy Samal Ibraevanyń aıtýynsha, arystandy Almaty zoobaǵyna berý máselesi belsendi azamattardyń arqasynda sheshildi.
«Árıne, jabaıy janýarlardyń orny tabıǵatta. Biz olardyń haıýanattar baǵynda bolýyn quptamaımyz, biraq dál osy jaǵdaıda basqa amal joq. Almaty zoobaǵy arystandy qabyldap alady. Ol úshin Halyqaralyq qar barysy qoryna (Snow Leopard Foundation) alǵys aıtamyz. Árıne, arystannyń óziniń qorshaýy men tamaǵy bolýy kerek. Ol aıtarlyqtaı qarjyny talap etedi. Osy oraıda kómek qolyn sozǵan Sanjar Boqaev pen Rýslan Jemkovke rahmet aıtamyn. Bul azamattar arystannyń tamaǵyna kraýdfandıng arqyly qarajat jınaý sharasyn uıymdastyrdy. Arystandy tamaqtandyrý úshin kúnine 10-15 keli et qajet. Bul qarajat zoobaq janýardy óz balansyna qabyldaǵanǵa deıin qajet bolady, bul kem degende 3-4 aıǵa sozylady», - dedi Samal Ibraeva.
Onyń aıtýynsha, Almatydaǵy janýarlardy qorǵaý qorynyń múshesi Natalıa Sýljık arystandy qutqarýǵa baryn salǵan. Ol Sanjar Boqaevpen birge Almaty zoobaǵynyń ákimshiligimen shuǵyl túrde kelissóz júrgizip, ornalastyrý máselesin sheshti.
Óz kezeginde Natalıa Sýljık Facebook paraqshasyna Besqaınarda túsirilgen vıdeony saldy. Arystan áli burynǵy ıesiniń úıinde.
«Arystannyń aty – Djýma. Almaty zoobaǵy arystandy óz qamqorlyǵyna alady. Alaıda, bir shart qoıdy. Aldaǵy ýaqytta oǵan Sımbanyki sııaqty qorshaý salyp berý qajet. Ázirge bizge eski jazǵy qorshaýdy qalpyna keltirýdi usyndy. Kelesi jyldyń qysyna deıin jańa qorshaý qajet bolady», - dep jazady Natalıa.
Eske sala ketsek, buǵan deıin Almaty oblysynda sharýa qojalyǵy ıesiniń arystan asyrap jatqany anyqtalǵan bolatyn.
Almaty oblystyq polıtsııa departamenti baspasóz qyzmetiniń málimetinshe, 8 aqpan kúni Talǵar aýdanynyń polıtsııa basqarmasyna habarlama kelip túsken.
Ol jerde Besqaınar aýdanyndaǵy sharýa qojalyqtyń birinde arystan bar ekeni habarlanǵan.
Tártip saqshylary shaǵym boıynsha belgilengen mekenjaıdy tekserýge barǵanda aqparat rastalǵan.
