Almaty men Ankara arasynda áýe reısteri ashyldy

ASTANA. QazAqparat - Almaty jáne Ankara qalalary arasynda aptasyna eki ret tikeleı áýe reısi jasalatyn boldy, dep habarlaıdy QR IIDM baspasóz qyzmeti.

Buǵan deıin Qazaqstan Respýblıkasy Prezıdentiniń tapsyrmasy boıynsha Qazaqstan men Túrkııa arasyndaǵy áýe qatynasy máseleleri boıynsha Túrkııanyń avıatsııalyq bılik oryndarymen kelissózder júrgizilgen bolatyn. Nátıjesinde taraptar marshrýttardy, reıster sanyn eki esege jáne tasymaldaýshylardy kóbeıtý jóninde ýaǵdalastyqqa qol jetkizdi.

Osy jumystyń nátıjesinde «Pegasus Airlines» túrik avıakompanııasy aǵymdaǵy jyldyń 1 qarashasynan bastap Almaty – Ankara baǵyty boıynsha jańa reısti iske qosty, qazaqstandyq jolaýshylar Túrkııa astanasyna tikeleı reıstermen saıahattaýǵa múmkindik aldy.

Almaty jáne Ankara qalalary arasyndaǵy turaqty reıster A320 jáne B737 tıpti áýe kemelerimen sársenbi jáne senbi kúnderi aptasyna 2 ret oryndalatyn bolady.

Reısterdi ulǵaıtý jáne ushý geografııasyn keńeıtý Qazaqstan men Túrkııa arasyndaǵy saýda-ekonomıkalyq, iskerlik, ınvestıtsııalyq jáne týrıstik yntymaqtastyqty odan ári damytýǵa yqpal etetin bolady.