Almaty mańyndaǵy aýylda er adamǵa oq atyldy: Polıtsııa kúdiktini izdestirip jatyr

ALMATY. QazAqparat - Almaty oblysy, Qarasaı aýdany, Shalqar aýylynda belgisiz bireý er adamnyń aıaǵyna oq atty. Onyń jaǵdaıy óte aýyr. Polıtsııa kúdiktini izdeýde, dep habarlaıdy QazAqparat tilshisi.

Oqıǵa ornynan túsirilgen vıdeo áleýmettik jelide tarady. Beınejazbada kýágerler qarýly shabýyldyń ornyn kórsetedi. Sondaı-aq onda oqıǵa saldarynan egde jastaǵy adamnyń jaralanǵany aıtylady.

Almaty oblystyq Polıtsııa departamentiniń baspasóz qyzmetiniń málimetinshe, oqıǵa 24 sáýirge qaraǵan túni bolǵan. Shalqar aýylynyń 62 jastaǵy turǵyny zardap shekken.

«Tekserý barysynda Qaskeleńniń 29 jastaǵy turǵyny anyqtaldy. Ony ustaý boıynsha jedel izdestirý is-sharalary júrip jatyr. Bul fakt «adam óltirý oqtalý» áreketi retinde tirkeldi. Іstiń sebepteri men mán-jaıy anyqtalady. Ózge aqparat jarııa etilmeıdi», - dedi Almaty oblystyq polıtsııa departamentiniń baspasóz qyzmeti.

Dárigerler zardap shekken adamnyń sol aıaǵyn oq tesip ótkenin aıtty. Ol shamamen saǵat 23.00-de Qarasaı aýdandyq ortalyq aýrýhanasyna jetkizilgen. Er adamnyń jaǵdaıy óte aýyr.

«Naýqas reanımatsııa bólimine tústi. Ol sol jaq aıaǵynan jaralanǵan. Sol jaq jilinshigine oq tıgen. Aıaǵynyń eki súıeginiń joǵarǵy bóligi synǵan. Jalpy jaǵdaıy óte aýyr. Jasandy tynys aldyrý apparatynda jatyr», - dep habarlady oblystyq qoǵamdyq densaýlyq saqtaý basqarmasynan.

Eske sala keteıik, 24 sáýir kúni Almatyda turǵyn úı kesheniniń kúzetshisi ańshy myltyǵynan jaraqat aldy.

Polıtsııa departamentiniń málimetinshe, kúzetshi men belgisiz er adamnyń arasynda týyndaǵan janjal saldarynan kúzetshini aǵshy myltyǵymen aıaǵynan atqan.