Almaty kóshelerinde jumys kúnderi 555 myńǵa deıin kólik júredi

ALMATY. QazAqparat – Almaty kóshelerinde jumys kúnderi 555 myńǵa deıin kólik júredi. Bul týraly óńirlik kommýnıkatsııalar qyzmetinde ótken brıfıngide Tsıfrlandyrý basqarmasy basshysynyń orynbasary Serik Baıǵanın málim etti, dep habarlaıdy QazAqparat.

Spıkerdiń aıtýynsha, «Sergek» zııatkerlik júıesi qaladaǵy kólikterdiń sany men olardyń negizgi baǵyttary, saparlardyń uzaqtyǵy men kólik quraldarynyń ekologııalyq áseri týraly kóptegen derekti jınaýǵa jáne óńdeýge múmkindik beredi.

Aıtýynsha, qazir Almatyda jumys kúnderi 555 myńǵa deıin kólik júredi, onyń ishinde tańerteńgi jáne keshki qarbalas ýaqytta 170 myńǵa deıin kólik qozǵalysy baıqalady. Barlyq kólikter táýligine 16 mln km jol júredi. Osy derekterdiń kómegimen qaladaǵy tartylys aımaqtaryn anyqtaýǵa, bolashaq marshrýttardy boljaýǵa, sol arqyly bolashaq jol-kólik qozǵalysynyń modelin qurýǵa bolady.

Serik Baıǵanın «Sergek» tek jol qaýipsizdigi ǵana emes, qoǵamdyq qaýipsizdikti de qamtamasyz etetinin atap ótti. Kameralar qalanyń krımınogendik aımaqtarynda, mektepterdiń janynda, turǵyn úılerdiń aýlalarynda ornatylǵan. Kameralardyń ornalasatyn jerin Polıtsııa departamenti tek jol-kólik oqıǵalary men ondaǵy adam ólimi boıynsha ǵana emes, qoǵamdyq oryndarda jasalǵan qylmystyq jáne ákimshilik quqyq buzýshylyqtar boıynsha da jaǵdaıdy taldaýǵa baılanysty tańdaıdy.

Buǵan deıin habarlaǵanymyzdaı, Almatyda «Sergek» kameralary ornatylǵaly beri jol-kólik oqıǵalarynan qaza bolǵandar sany 40%-ǵa (2019 jylǵy 161-den 2022 jyly 96-ǵa deıin) qysqarǵan.