«Almaty – Kókpek – Kóktal – Qorǵas» tasjolyn sýy shaıyp kete jazdady

ASTANA. QazAqparat – Jol mamandary qumnan bóget jasap, erigen qar sýyn burý jumystaryn júrgizý nátıjesinde respýblıkalyq avtojoldyń eki jerde shaıylyp ketý qaýpin aldyn aldy, dep habarlaıdy QazAqparat respýblıkalyq mańyzy bar avtomobıl joldarynyń ulttyq operatoryna silteme jasap.

Operatordyń habarlaýynsha, qalyptasqan jaǵdaı «Almaty – Kókpek – Kóktal – Qorǵas» tasjolynyń 139 jáne 142 shaqyrymdaryna qatysty bolyp otyr. Qazir erigen qar sýy kópirdiń astymen ótýde.

Erigen qar sýy kúnniń jylynyp, taý bókterindegi qardyń tez erýine baılanysty paıda boldy.

«Qazir jaǵdaı turaqty. Ýchaskelerde arnaıy tehnıka jumys istep jatyr, qajet jol belgileri ornatyldy. Jol qozǵalysyna engizilgen shekteýler joq. Tasjol táýlik boıy «QazAvtoJol» UK» AQ Almaty oblystyq fılıalynyń erekshe baqylaýynda bolady»,-delingen habarlamada.

Vıdeodan alynǵan kadr