Almaty kitaphanalary qoǵamdyq keńistikke aınalady
Almatydaǵy barlyq kitaphanalarǵa jóndeý jumystary júrgiziledi. Qosymsha jańalary salynady. Sonymen qatar, aldaǵy ýaqytta kitaphanalar qoǵamdyq keńistikke aınalady.
«Kitaphanalarda biz jas qalamgerlerdi óz týyndylaryn iTunes, yandex, bookmate, amazon sekildi sandyq quraldar arqyly tabysty satý jáne ilgeriletý ádisterine úıretetin bolamyz. Bizde ózindik qoltańbasy bar, mádenı jáne tarıhı muralar ana sútimen daryǵan shynaıy talantty jazýshylar bar. Tıisti qoldaýdyń arqasynda bizdiń jazýshylarymyz dúnıejúzi boıynsha óz oqyrmandaryn tabaryna senimdimin», - dedi ákim.
Sonymen qatar, ol Almaty qalasyn qazaqstandyq sáýletshilerdiń negizgi oqý ortalyǵy dep atady. Ákimdik megapolıstiń biregeı tarıhı ǵımarattary týraly aqparat jınaý jumystaryn bastady.
«Biryńǵaı sáýlettik jáne dızaınerlik kodty jasap, qalamyzdaǵy bolashaq obektilerdiń qurylysyna engizemiz. Qazirgi dızaın tarıhı ǵımarattarmen úılesýi tıis. Jańadan salynǵan árbir obekt qalamyzdy tartymdy etip, ereksheleı túsýi qajet»,- dep atap ótti Baqytjan Saǵyntaev.
Ákimniń pikirinshe, Almatydaǵy sán kórsetilimderi dástúrli is-sharalar ǵana emes, sondaı-aq sán ındýstrııasynyń problemalaryn talqylap, ony sheshý joldaryn izdestiretin alańǵa aınalýy tıis.
« Biz jumysyn jańa bastaǵan jas dızaınerlerge sheberhanalar usynyp, ónimderin ishki naryqta nasıhattaýǵa kómektesemiz»,- dedi Saǵyntaev.
Jańa medıa – bul Almatyda paıda bolyp, qarqyndy damyp kele jatqan ınteraktıvti elektrondyq basylymdar. Onyń damýy áleýmettik jeliler men blog-platformalar tanymaldyǵynyń artýyna da tikeleı serpin berdi.
«YouTube, Instagram, Twitter sııaqty platformalar mınımaldy ınvestıtsııalardyń kómegimen tanymal kontent qurýǵa jáne jaqsy aqsha tabýǵa múmkindik berdi. Osylaısha, bizdiń jastarymyz úlken jetistikterge qol jetkizip otyr. Olar Qazaqstanda ǵana emes, sonymen qatar TMD elderinde de birshama tanymal. Mundaı qyzyǵýshylyqqa qoldaý kórsetip, ári qaraı damytýymyz qajet»,- dedi ákim.
Sonymen qatar, ol oıyn-saýyq ındýstrııasy - qoǵamdyq oryndar, murajaılar jáne zamanaýı óner týraly aıtty.
«Almaty qalasynyń «Kún beldeýi» úlken attraktsıondar parkin qurýǵa múmkindik beredi, olar tek Qazaqstan óńirleriniń turǵyndary úshin ǵana emes, sheteldik týrıster úshin de tartylys aımaǵyna aınalady. Biz oqıǵaly týrızmdi damytamyz. El ishinde de, shetelden kelgen qonaqtardy da tartatyn kontsertter, shoý, festıvaldar, qoıylymdar ótkizý qajet. Sondaı-aq oıyn túrinde oqytýǵa (edutaintment) negizdelgen nysandardy damytý qajet. Bul mýzeıler, kórmeler jáne basqa da qoǵamdyq keńistik, munda turǵyndar men qonaqtar, ásirese balalar oıyn-saýyq arqyly elimizdiń, qalamyzdyń, ólkemizdiń baı tarıhyn tanıdy»,- dep atap ótti Baqytjan Saǵyntaev.
Sóz sońynda Saǵyntaev, Almatyda jumys isteıtin turǵyndardyń 70% joǵary bilimdi ekenin atap ótti. Megapolıste - 39 joǵary oqý orny bar. Jumyspen qamtylǵandardyń úshten ekisi (2/3) shaǵyn jáne orta kásipkerlikte, ol qazynaǵa salyqtyń 63%-yn ákeledi. Investorlar úshin jańa qoldaý quraldary salyndy. Áleýmettik kásipkerlik korporatsııasy bazasynda «bir tereze» qaǵıdaty boıynsha qyzmet kórsetetin Almaty Invest ortalyǵy ashyldy.
Qala ákimi ınvestorlardy megapolıs ekonomıkasyn damytýǵa shaqyrdy.
