Almaty – Qazaqstan ekonomıkasynyń qozǵaýshy kúshi

ALMATY. QazAqparat – Jyl basynan beri megapolıs ekonomıkasy qarqyndy túrde ósip keledi. Qysqa merzimde ekonomıkalyq ındıkator 122,2%-ke deıin, jyldyq ınflıatsııanyń baıaýlaýy aıasynda iskerlik belsendilik ındeksi 58,7% tarmaqqa deıin jedeldedi. Saýda, óńdeý ónerkásibi, kólik pen qoımalaý – ekonomıkalyq ósimniń draıveri boldy, dep habarlaıdy QazAqparat tilshisi.

Buǵan deıin Qasym-Jomart Toqaev shahardy órkendetýge qatysty birneshe baǵytta atqarylýǵa tıis jumystarǵa nazar aýdarǵan bolatyn.

Memleket basshysynyń aıtýynsha, eń aldymen, qala ekonomıkasyn ártaraptandyrý arqyly onyń turaqty damýyn qamtamasyz etý qajet. Almaty – elimizdiń ekonomıkalyq damýynyń qozǵaýshy kúshi jáne kóshbasshysy. Jalpy ishki ónimniń besten bir bóligi, bıýdjet kirisiniń 25 paıyzdan astamy jáne Qazaqstannyń saýda operatsııalarynyń úshten bir bóligi osy qalaǵa tıesili.

«Ekonomıkanyń ártaraptandyrylý deńgeıiniń tómen bolýy qala turǵyndary tabysynyń ósimin baıaýlatady. Qala «ortasha tabys tuzaǵyna» tústi, odan shyǵý úshin qala ekonomıkasyn túbegeıli ártaraptandyrý qajet. Óńdeý ónerkásibin, týrızmdi, IT sektoryn jáne kreatıvti ındýstrııany damytýǵa basa nazar aýdarý kerek. Básekelestikti yntalandyrý, ınvestıtsııa tartý jáne eńbek ónimdiligin aıtarlyqtaı arttyrý qajet. Qala jaǵdaıyndaǵy óńdeý ónerkásibin damytý isi ekologııalyq taza jáne yqshamdy zamanaýı tehnologııalardy qoldana otyryp, úderisterdi joǵary deńgeıde avtomattandyrýmen jáne tsıfrlandyrýmen qatar júzege asyrylýy kerek. Almatynyń ındýstrııalyq aımaǵy men «Alataý» ınnovatsııalyq tehnologııalar parkiniń áleýetin tolyq paıdalaný qajet», – degen edi Prezıdent Almaty jurtshylyǵymen kezdesý barysynda.

Memleket basshysynyń tapsyrmasyn basymdyqqa ala otyryp, Almatyda memlekettik jáne qalalyq baǵdarlamalar aıasynda 3 myńnan astam jobany qoldaý úshin bıyl 44 mlrd teńge bólindi.

Qysqa merzimde ekonomıkalyq ındıkator 122,2%-ke deıin, jyldyq ınflıatsııanyń baıaýlaýy aıasynda iskerlik belsendilik ındeksi 58,7% tarmaqqa deıin jedeldedi. Saýda, óńdeý ónerkásibi, kólik pen qoımalaý – ekonomıkalyq ósimniń draıveri boldy.

Qalada jyl basynan beri iskerlik belsendiliktiń aıtarlyqtaı ósýi baıqalady. Bıylǵy jyldyń birinshi toqsanynda iskerlik belsendilik ındeksiniń deńgeıi boıynsha (58,7% ) Almaty Qazaqstan óńirleri arasynda birinshi orynǵa shyqty. Qysqa merzimdi ekonomıkalyq ındıkator 23,9% artty.

Ókilettikterdi ortalyqsyzdandyrý jónindegi Memleket basshysynyń tapsyrmasyn oryndaý boıynsha, 1 sáýirden bastap qalalyq ákimdiktiń 15 fýnktsııasy aýdandyq ákimdikterge berilip, olardyń bıýdjeti 2,7 ese, ıaǵnı 161,6 mıllıard teńgege deıin ulǵaıtyldy.

Esepti kezeńde negizi kapıtalǵa 484 mlrd teńge ınvestıtsııa tartyldy. Bul rette jeke ınvestıtsııalar 2,7%-ke ósken.