Almaty qalasynyń bıýdjeti 265,4 mlrd teńgege ulǵaıdy
Erbolat Dosaev máslıhattyń kezekten tys sessııasynda 2023-2025 jyldarǵa arnalǵan qala bıýdjeti Almatyny damytý baǵdarlamasynyń negizgi basymdyqtary negizinde qalyptasqanyn atap ótti.
«Osy jyldyń І-shi toqsanynda ekonomıkanyń qarqyndy damýy bıýdjetti naqtylaýǵa negiz boldy. Qysqa merzimdi ekonomıkalyq ındıkator 23,9%-ke ósti. Saýda (+29,4%), óńdeý ónerkásibi (+24,5%), kólik (+21,8%) salalary ekonomıka ósiminiń draıverleri boldy. Ekonomıkanyń damı túsýi memlekettik bıýdjetke túsetin túsimderdi 32,1%-ke arttyrdy (barlyǵy 1 241,1 mlrd teńge salyq jáne mindetti tólemder (132,1%), onyń ishinde respýblıkalyq bıýdjet - 941,8 mlrd teńge (139,3%), jergilikti bıýdjet – 299,3 mlrd teńge (133,5%). Sizderge bıýdjetti naqtylaýǵa usynylǵan 265,4 mlrd. teńge osy jyldyń І-shi toqsanyndaǵy qosymsha kiristi qalyptastyrý, bıýdjet qarajatyn ishteı qaıta bólý jáne ótken jyldyń bos qaldyqtary esebinen júrgizilýde»,- dedi qala ákimi.
Aıtýynsha, qosymsha qarajat negizinen kólik ınfraqurylymyn qalyptastyrýǵa, turǵyn úı-kommýnaldyq sharýashylyq ınfraqurylymyn modernızatsııalaýǵa, áleýmettik qamtýǵa, bilim berý men densaýlyq saqtaýdy damytýǵa, qalany abattandyrýǵa jáne kógaldandyrýǵa baǵyttalatyn bolady.
Sonymen qatar Erbolat Dosaev ákimdiktiń bastamasymen jáne Memleket basshysynyń qoldaýynyń arqasynda 1 sáýirden bastap aýdandyq ákimdikterge qalalyq deńgeıden qosymsha 15 fýnktsııa berilgenin tilge tıek etti. Osy oraıda, ókilettikterdi ortalyqsyzdandyrý sheńberinde jáne aǵymdaǵy naqtylaýdy eskere otyryp, 8 aýdandyq ákimdiktiń 2023 jylǵa arnalǵan bıýdjetteri 60,4-ten 164,5 mlrd teńgege deıin 2,7 ese kóbeıedi. Budan basqa aýdan ákimdikteriniń shtat sany 152 birlikke ulǵaıdy, onyń ishinde jańasy – 56, 96-y qalalyq basqarmalardan berildi.
«Osy sharalardyń arqasynda aýdan ákimdikterinde jańa múmkindikter men qosymsha qarjy resýrstary paıda bolady, sheshimder qabyldaý jyldamdyǵy men sapasy jaqsarady ári aýdan ákimderiniń halyq aldyndaǵy jaýapkershiligi artady»,- dedi Erbolat Dosaev.
