Almaty dárihanalarynda kezek azaıdy, dári-dármek jetkilikti
Búgin BAQ ókilderi qaladaǵy iri dárihanalarǵa baryp, baqylaý júrgizgen bolatyn.
«Uzyn-sonar kezek osydan 1 apta buryn bolǵan. Qosymsha kassa termınaldary ashyldy. Qosymsha qyzmetkerler aldyq. Nátıjesinde kezek máselesi tolyq sheshildi. COVID-19 emdeýge arnalǵan dáriler túgel bar. Antıbakterıalyq, antıkogýlıanttyq, qabynýǵa qarsy preparattar barlyǵy bar. Dárihanalar tolyq qamtylǵan. Kúnde jetkizilip jatyr»,- deıdi «Aptekaplıýs» dárihanasynyń bólim meńgerýshisi Aınur Almahambetova.
Buǵan deıin dárihanalarǵa kezekke turǵan adamdar 2 saǵattap tún ortasyna kútkenin jazǵan bolatynbyz.
«Búginde dári-dármek ýaqytynda kelip otyrady. Aptasyna 1-2 ret taýar alamyz. Adamdar tarapynan kóbinese aspırın, qyzý túsiretin dárilerge suranys kóp», - dedi basqa dárihana meńgerýshisi Gúlnar Medıbek.
Shilde aıynan bastap ákimdik jedel jelini iske qosty. Bul baılanys telefondary arqyly turǵyndar dári dármektiń bar-joǵyn bile alady.
«14 shildeden bastap dárilik zattarǵa suranys azaıa bastady. 14 shildede táýligine 1000 qońyraý tússe, qazir 250 adam ǵana habarlasady», - deıdi «Qoldaý» ortalyǵynyń departament dırektorynyń orynbasary Rýzana Taranýha.
Almaty ákimdigi dárimen qamtý boıynsha úılestirýshisi Zańǵar Sálimbaevtyń aıtýynsha, ákimdik 29 maýsymda iri óndirýshilermen kelisimge kelgen.
Barlyǵy 105 dárihanamen yntymaqtastyq týraly memorandýmǵa qol qoıyldy.
Sonymen qatar, bir adamǵa 3 dáriden artyq satylmaıdy. Bul alyp-satý áreketterdiń jolyn kesý úshin jasalǵan.
«10 shildede ár elden 6 mln jýyq medıkament ákelindi. Qazir Úndistannan taǵy bir ushaq keledi. 30 tonna júkti ákimdik satyp aldy. Bul kúz ben qysqa qor jasaý úshin kerek bolyp jatyr. Naryqty retteý úshin ákimdik 5 mlrd teńge bólip, turaqtandyrý qoryn ashty. Odan bólek aýrýhanalardy dárimen qamtý úshin qosymsha 5 mlrd teńge bólindi», - dedi spıker.
