Almaty botanıkalyq baǵynda medıtsınada keńinen qoldanylatyn ósimdik ósedi

ALMATY. QazAqparat – Almaty botanıkalyq baǵynda 1989 jyldan beri dárilik ósimdik – medıtsınada keńinen qoldanylatyn Severtsov korolkovııa ósimdigi ósip jatyr, dep habarlaıdy QazAqparat tilshisi.

Qazaqstan terrıtorııasy dárilik ósimdikterge baı. Olardyń arasynda resmı medıtsınada qabyldanǵan, halyq medıtsınasynda keńinen qoldanylatyn ósimdikter de bar. Solardyń biri – Ortalyq Azııanyń endemıgi Severtsov korolkovııa. Olar taý eteginde, sazdy jáne tasty betkeılerde ósedi.

Botanıkalyq baqtyń málimetinshe, Severtsov korolkovııa (lat. Fritillaria sewerzówii) lalagúldiler tuqymdasynyń Rıabchık túrine jatady, kóp jyldyq shóptesin ósimdik. Ósimdik áýesqoı botanık Nıkolaı Korolkov esimimen atalady, al túriniń ataýy reseılik zoogeograf jáne ekolog Nıkolaı Severtsovtyń qurmetine berilgen.

«Severtsov korolkovııa bıiktigi 25-50 sm jetedi. Sabaǵy túzý, jalańash, qalyń, balama japyraqtary bar, olar kókshil gúlmen jabylǵan. Gúlshoǵyry – kóptegen qońyraý tárizdi salbyraǵan gúlderi bar. Tómen jaqtaǵy gúlderi úlkendeý, uzyndyǵy 2,5 sm-ge deıin, qos jynysty, ústińgileri stamınaldy bolady. Gúlderdiń túsi kóbinese jasyl-qońyr, keıde qara-qońyr nemese altyn-sary bolady. Quramynda 40% deıin krahmal jáne 1% alkaloıdtary bar. Qazaq, ózbek halyq medıtsınasynda adamnan ter shyǵaratyn ósimdik retinde qoldanylyp keledi», - dep habarlady zoobaqtyń ujymy.

Qazirgi ýaqytta Severtsov korolkovııa botanıkalyq baqtyń dárilik ósimdikterdi jınaý aımaǵynda ósedi. Botanıkalyq baqta alǵash ret ol 1989 jyly egilgen bolatyn.