Almaty áýejaıynyń jańa termınaly 2024 jyly ashylady

ALMATY. QazAqparat - Almaty halyqaralyq áýejaıyndaǵy jańa termınal qurylysynyń 65 paıyzy aıaqtaldy. Bul týraly TAV Airports Holding kompanııasynyń prezıdenti Serkan Kaptan qala ákimi Erbolat Dosaevpen kezdesý barysynda málim etti, dep habarlaıdy QazAqparat tilshisi.

Serkan Kaptan atap ótkendeı, qazir negizgi qurylys-montaj jumystary 65%-ǵa bitti. Qoldanystaǵy termınaldyń estakadasy bıyl 1 qyrkúıekke deıin ashylady. Nysandy paıdalanýǵa berý belgilengen merzimnen buryn – 2024 jyly jaz aılarynyń basyna josparlanyp otyr.
Qala basshysy ınvestorǵa Almaty áýejaıynda qyzmet kórsetý sapasyna qatysty birqatar máseleni aıtty. Almatylyqtar men qala qonaqtary birneshe saǵattyq kezekti, júkti uzaq kútýdi, kólik turaǵynyń jetispeýshiligin jáne tıisti shara qabyldaýdy talap etetin ózge de yńǵaısyz jaǵdaıǵa tap bolyp otyr.
Serkan Kaptannyń sózinshe, jazǵy kanıkýl men demalys kezinde reısterdiń kóbeıýine baılanysty qosymsha kezek pen keptelis baıqalýy múmkin. Áýejaı ákimshiligi qyzmet kórsetý sapasyn jaqsartý boıynsha sharalar qabyldap otyr – júk jelileri jańartyldy, jańa kondıtsııa júıeleri ornatyldy, jaıly avtobýstar satyp alyndy.
«Jańa halyqaralyq jolaýshylar termınalynyń aýdany 53 500 sharshy metr. Ol paıdalanýǵa berilgen soń Almaty áýejaıynyń ótkizý qabileti jylyna 14 mln adamǵa deıin artady, bul áýe aılaǵynyń jumysyn retke keltirýge múmkindik beredi. Aıta keteıik, byltyr Almaty halyqaralyq áýejaıy jylyna 2,7 mln adamǵa eseptelgen ótkizý qabileti kezinde 7,2 mln jolaýshyny qabyldady. Bıyl jolaýshylar sany 9 mln adamǵa deıin ósedi dep boljanýda»,- dep habarlady ákimdikten.
Jańa jolaýshylar termınaly ashylǵan kezde áýejaı ákimshiligi eskisin jańartýdy kózdep otyr. Osylaısha, jańa jolaýshylar termınaly tek halyqaralyq reısterge, al qoldanystaǵy termınal ishki reısterge qyzmet kórsetedi.
Almaty halyqaralyq áýejaıyn keńeıtý jónindegi aýqymdy joba jolaýshylar termınaly men jalpy maqsattaǵy avıatsııanyń jańa ǵımarattaryn salýdy, sonymen qatar estakadany, ushý-qoný jolaǵyn jáne vokzal mańy aýmaǵyn qaıta jańartýdy qamtıdy.
Keńes qorytyndysy boıynsha taraptar kórsetiletin qyzmetterdiń sapasyn jaqsartýǵa baǵyttalǵan birlesken Jol kartasyn iske asyrý týraly ýaǵdalasty.
Byltyr jaz aıynda Almaty halyqaralyq áýejaıy jańa termınalynyń eskızi jarııalanǵan bolatyn.