Almaty áýejaıynyń mańynda kólik qozǵalysynyń syzbasy ózgerdi

ALMATY. QazAqparat – Almaty halyqaralyq áýejaıynda termınaldyń turaq aımaǵynda kúrdeli jóndeý jumystary júrip jatyr. Osyǵan baılanysty áýejaı ákimshiligi ǵımarat aldyndaǵy kólik qozǵalysynyń syzbasyn ózgertti, dep habarlaıdy QazAqparat tilshisi.

Almaty halyqaralyq áýejaıynyń baspasóz qyzmeti habarlaǵandaı, áýejaı aýmaǵynda avtobýs qozǵalysynyń baǵyty ózgertildi.

«Avtobýs Maılın kóshesinen kirip, termınal ǵımaratyna barmaı, arnaıy bólingen jolaqpen Ahmetov kóshesine shyǵady. Eske salaıyq, áýejaı aýmaǵynan shyǵý úshin jolaýshylar Maılın kóshesine shyǵýǵa bolatyn búkil 6 pýnkti paıdalana alady. Sondaı-aq, áýejaı aýmaǵynan Ahmetov kóshesine qosymsha deńgeıli parkıng arqyly shyǵa alady» delinedi habarlamada.

Sondaı-aq, qarbalas ýaqytta áýejaı aýmaǵynan kólikterdiń kedergisiz shyǵýy úshin shlagbaým ashylady.

Kólik aǵynyn azaıtý úshin termınal ǵımaratynyń aldyna jolaýshylardy túsirý úshin qosymsha úshinshi jolaq bólingen.

Osy jolaqty paıdalana otyryp, júrgizýshiler turaqtan shyǵyp bara jatqan kólikterge tosqaýyl qoımaı jolaýshylaryn túsirip, alyp kete alady.

«Avtokólikter keptelisin boldyrmas úshin áýejaı aýmaǵynan shyqpas buryn turaq aqysyn aldyn ala tóleý usynylady. Ol úshin termınalǵa kireberiste ornatylǵan parkomattardy paıdalaný qajet. Tólem kartamen, qolma-qol aqshamen jáne bank qosymshasymen qabyldanady. Áýejaı aýmaǵyndaǵy qozǵalysty jeńildetý úshin barlyq qajetti jedel jáne tehnıkalyq sharalar qabyldanyp jatyr», - dep habarlady áýejaıdan.

Eske salaıyq, Almatyda áýejaıynda kólikterge arnalǵan pandýs jabylǵan bolatyn.