Almaty áýejaıynyń qyzmetkerleri jelidegi vıdeodan keıin jazalandy

ALMATY. QazAqparat - Áleýmettik jelide Almaty halyqaralyq áýejaıy qyzmetkerleriniń jolaýshylar júgin uqypsyz túsirip jatqany kórsetilgen vıdeo tarap jatyr. Buǵan qatysty áýejaıdyń baspasóz qyzmeti túsinik berdi, dep habarlaıdy QazAqparat tilshisi.

Áleýmettik jeli paıdalanýshysy Almaty áýejaıynda júk tıeýshilerdiń júkti laqtyrǵan vıdeosyn jarııalady.

Áýe aılaǵynyń baspasóz qyzmeti ushatyn reısterdiń birinde júkti (jolaýshylar bagajyn emes) tıeý talaby buzylǵanyn rastady.

«Júkti abaısyz tıegen qyzmetkerler tártiptik eskertýler aldy. Mundaı qatege jol bermeý úshin áýejaıdaǵy barlyq júk tıeý qyzmetkerine nusqaý jáne júkti durys suryptaý boıynsha jadynamalar berildi. Júkti tıeý protsedýrasynyń durystyǵyn baqylaý úshin qosymsha tekserýler júrgizilip jatyr», - dep habarlady áýejaıdyń baspasóz qyzmetinen.

Vıdeodan alynǵan kadr